Малайзиянал хъуншагьру Куала-Лумпурдай тайский боксрал соревнованиярттай мусил медаль ларсун дур Сургутраясса 11 шинавусса Риана Каравалиевал. Ва цуппагу ЧIурттащиял шяраватусса бусса бур.
«Зувиллий кIира кило кIушиврул дусса, 10-11 шиннавусса душваврал категориялуву турнирданул мусил медаль ларсунни Риана Каравалиевал»!
«Сургутраясса дуклаки душ Риана Каравалиева тайский боксрал дунияллул первенстволий ххув хьунни».
Вай Тюменнал областьрайсса машгьурсса изданиярттайсса макьаларттал цалчинсса ххарур. Шиккува бусан, гьашину март зуруй, Дунияллул халкьуннал дянивсса Олимпий комитетрал хIукмулийн бувну, Аьрасатнал ва Белоруссиянал спортсментуран къадагъа дурну дур дунияллул халкьуннал лагрулийсса соревнованиярттай гьуртту хьун, амма тайский боксрал Дунияллул халкьуннал ассоциациялул оьрчIайн ва чIаважагьилтурайн санкциярду къадагьлагьиссар тIисса бази бувну бур. Сургутраясса спортсментуравух Рианащагу Малайзиянал турнирданий гьуртту хьун бювхъуну бур ва мусил медальданущал занахьуну бур.
Жугу дакIнийхтуну барча буллай буру чIава чемпионка. Хъуни-хъунисса ххувшавурттачIансса ххуллул дайдихьуну лякъиннав вил ххувшаву, аслансса лакку душ!