Август зурул 31-нния сентябрьданул 2-ннийн бияннин Нижний Новгородрай хьунтIиссар «Знание» тIисса Федерал просветительский марафон.
Шикку мастер-классру ккаккан бантIиссар Дмитрий Песковлул, Сергей Кириенкол, Сергей Лавровлул, Сергей Собяниннул ва цаймигу машгьурсса инсантурал.
Марафондалий спикерну гьуртту хьунтIиссар жула лакку оьрчI, «2021 шиналсса блогер», «Твоя грамотность» проектрал сакиншинначи Саэд Илиясов.
«Знание» тIисса марафон щалагу билаятрал просвещениялул давриву, ца яла агьаммур проектну хъанахъиссар. Аьрасатнал Президент Владимир Путиннул сипталийну цIу дуккан дурсса «Знание» тIисса обществалул сакиншинначитурал хIадур дурну дур ва мероприятиялун хасъсса авадансса программа. Шикку лекцияртту буккинтIиссар 200-нния ливчусса хьхьичIунсса паччахIлугърал ишккаккултрал, бизнесментурал, элму машгьур дуллалисса аьлимтурал ва медиаиндустриялул пишакартурал.
Буниялагу пахру бан лайкьсса иш бур укунсса даражалул мероприятиялий оьрус мазрал хIакъиравусса лекция буккинтIисса жула лакку оьрчIая.
Марафондалул трансляция ххал дан бюхъантIиссар marathon.znanierussia.ru сайтрай.
