Ларгсса нюжмардий Дагъусттаннал паччахIлугърал университетраву ректор Муртазяли Рабаданов хьунаавкьунни республикалул СМИ-лул вакилтуращал. Гьарца шинах дуллай аьдатравун дагьсса пресс-конференция батIаврил мурадгу бия гьашину ДГУ-лувун абитуриентътал кьамул баврил кампаниялул хIасиллая бусласисса.
Журналистътурал суаллахьхьун жавабру дулун хьхьичI, ректорнал гьарта-гьарзану бувсуна цукунсса хIасиллащал бувкссарив цала вуз цIусса дуккаврил шинал дайдихьулийн.
Муртазяли Рабадановлул бусаврийну, гьашину ДГУ-лувун абитурентътал кьамул бувну бур бакалавриатрал 38 направлениялий, 7 специалитетрал ва магистратуралул 31 направлениялий.
Бюджетрал кIанттурду лахъ бан тIалав бувсса Аьрасатнал Президентнал амрулийн бувну, ДГУ-луву гьашину ккаккан бувну бивкIссар аьмну 1678 бюджетрал кIану. Миннува 1173 бакалавриатрал, 480 магистратуралул, 25 специалитетрал. Аьмну контрактрал гьанулий университетравун буххансса кIанттурду ккаккан бувну бивкIун бур 2165, миннува бакалавриатрал – 1010 кIану, магистратуралул – 870 ва специалитетрал 285 кIану.
Ректорнал бусаврийну, гьашину вузрал конкурсрал ца кIанайн най ивкIун ур дянивну ххюяксса инсан (2021 шинал ца кIанайн най ивкIун ур мукьаксса инсан). Абитуриентътурал дяниву яла бусравми направленияртту диркIун дур «Бизнес-информатика», «Юриспруденция», «Экономика» ва «Лингвистика».
Хъуннасса конкурс гьашину диркIун дур «Бизнес-информатикалийн». Шиккун ца кIанайн най ивкIун ур 11-12 инсан. Ххуйсса конкурс хьуну дур информациялул мюхчаншиву тIисса направлениялийнгу. Масалдаран, ккаккан бувсса 20 кIанайн, абитуриентътурая 165 аьрза бувкIун бур. Мукунна ххуйсса конкурс хьуну дур «Лингвистикалул» чил мазурдил факультетрайнгу. Ларгмур шинал 217 аьрза бивкIхьурча, гьашину 231 аьрза бувкIун бур. Аьдатрайн бувну, хъуннасса конкурс диркIун дур юридический ва экономический факультетирттайнгу.
Аьмну гьашину бюджетрал кIанттурдайн кьамул бувну бур 15428 азарва аьрза. ХIасил ларгмур шиналнияр 25 % ххину.
Муртазяли Рабадановлул кIицI бунни, гьашину ДГУ-лувун дуклан увхшиву 6560 студент. Мукунма ректорнал бусаврийну, гьашину аьрзри гьарзану бивкIун бур «Естественно-научный» профильданийгу. ХIисав бувну, ца кIанайн 3 аьрза буллусса хьуну бур.
Информациялул технологиялул факультетрал ккаккан бувсса бюджетрал 80 кIанайн буллуну бур 327 аьрза (2021 шинал бивкIун бур 166 аьрза). Информатикалул факультетрайн гьашину кунма чIявусса аьрзри уттинин такIуй буллуну бивкIун бакъар. Гьашину 700 аьрза буллуну бур (ларгмур шинал – 410 аьрза). Конкурс лахъну диркIун дур гьашину психологиялул факультетрайнгу – 130 аьрза. Шиккува кIицI лаган, юридический факультетрайн ларгмур шинал яла лагьмур балл бивкIхьурча 241, гьашину яла лагьмур балл ва факультетрайн бивкIун бур 251 балл.
Ректорнал мукунма бувсунни, хIасиллах бурувгун гьашину школарттай ЕГЭ дукIунияр лагьсса баллащал дуллушиву. КIицI бунни ванал, гьашину ДГУ-лувун дуклан буххан ччиминнавух чансса къабивкIшиву цайми вузру къуртал бувсса абитуриентъталгу. Масалдаран, магистратуралул ца кIанайн гьашину бивкIун бур 3 аьрза.
Хъунисса конкурсру диркIун дур «Экономикалул» направлениялийсса «ХIукуматрал ва муниципал управление» (ца кIанайн 8-ксса инсан), «Менеджмент» (ца кIанайн 7 инсан) ва «Экономика» (ца кIанайн 4-ксса инсан) факультетирттайнгу.
Бувсуна Муртазяли Рабадановлул, жулла хIукуматрайн баян бувсса санкцияртталмур щавщи ДГУ-лийнгу чан-кьансса асар хьушиву. Масалдаран, шикку дуклай бивкIсса ва вайннащал хIала-гьурттуну зий бивкIсса США-навасса, Кьиблалул Кореянавасса студентътал вания гихунмай шикку къадуклан тIий бур.
Филологиялул факультетрал хIакъираву Муртазяли Рабадановлул кIицI бувна, аьмну тагьар оьккисса къархьушиву. Амма дагъусттаннал мазурдил отделениялий шиная шинайн студентътал чанну букIлай буну, миллатирттал мазурдил отделениярттай дахханашивуртту хIисав хъанай душиву. Масалдаран, гьашину лакралмур отделениялул 1-мур курсрайн набор къархьуну тIий, гиккун дуклан бувхми вайннан багьну бур оьрус мазралмур отделениялийн бичин. Укунссара тагьар диркIун дур дукIу-кIулссану цайми-цайми миллатирттал отделениярттайгу. Гьашину къархьухьурча набор, ванил къатIиссар ялунчIингу къахьунтIишиву. Мунияту жува гьарнал хIарачат бан аьркинссар, бюхълай бухьурча, жула оьрчIру ялун нанисса дуккаврил шинал школарттай ниттил мазрах къулагъас дуну, лакку маз лахьлансса гъираращал ва отделениялийн буххан бансса маслихIат буллан.
