На кунма, шагьрулия шяравун гъинттулсса каникуллай бувкIсса оьрчIайн, шяраву учайва «шагьрулул оьрчIру» куну. «Шагьрулул оьрчI» тIисса мукъуйн ттул маниъшиву къадикIайва. Шяраваллил оьрчIаннив, жуяту цивппа аькьлу-кIулшилул, лагмасса шяраваллил оьрму цанма жуяр ххуйну кIулну бушаву ккаккан буван кунма, жухьхьун суаллу буллан бикIайва: «Ванин цичайссар, танин ци чайссар?» – тIий, ятту-гъаттара, лелуххант ккаккан буллай. Ттул хъунбуттал ва хъунбавал къатрал кьанчуллалу кюртти бувсса хьхьиру бикIайва. Ца чIумал мукунма къя-къя тIисса, лахъисса магърай кIяласса тIиму дусса лелуххи жул къатрал чапарданий щябивкIун бия. Ттухь яла хъунбуттал бувсуна га вяркъу бушиву. Дурккуна хъунбуттал: «Вяркъу Къянив лавгуна…» тIисса саннагу. Ттул хъунбуттан циняв лелуххантрал цIарду кIулну дикIайва. ЧIярусса дарув-дармандалун ишла дайсса урттугу кIулну дикIайва. Гай уртту дартIун кьакьан дайва. ЦачIана шагьрулия увкIсса хъамаличунангу дулайва, ссан дучIиссаривгу чагъарданий чивчуну. Га чагъаргу бишайва пакетравува. На шанна шин хьу­сса чIумал хъунбуттахъал духми къатравун увкIссара. Мунияту ттун хъинну кIулссия шяраваллил ишру.
– Утти на чIивисса оьрчI акъара. На гьашину къуртал бувссар мяйва класс. Ттун ссуттихуннай урчIилчинмур класс­равун лагайхту, бартлагантIиссар ацIния ххюра шин. Ттул паспортгу буссар. Мунияту на цавагу ишираву шяраваллил оьрчIаяр чансса затру кIулсса оьрчIгу акъассара. Ттуйн ттуйнмагу Арсен учай­ссар. Ттул хъунбутта ва хъунбава яхъанай бур Гьущими тIисса шяраву. Вай нукIува яхъанай бикIайссия МахIачкъалалив. Яла хъунбуттан шяравун изан ччай, цивппа яхъанахъисса къатригу жун кьадиртун, зунттавун бивзуна.
Хъунбуттал ОьмархIажинал давугу шяравусса иширттацIун дархIусса дуну, зунсса кIанугу шяраву хьуну бия. Хъунбава Ххадижатгу шяравун бивзсса шинал даву дакъа бивкIхьурчагу, кIилчинмур шинал ванингу шяравусса школалий даву хьуну дия. Ва тарихрал дарсирдал учительница бия. Вайннал ца къатлуву щаллусса чIира бувгьусса, луттирдал бувцIусса ишкапругу бия. Хъунбавал шеърирдугу чичайва. Вай ванил шагьрулий яхъанахъиний бавтIсса луттирду бушиву бусайва ттухь хъунбуттал. Ванил итабавкьусса шеърирдал шанма хъуни бакъасса лугу бия. Ттунгу хъинну гъира бикIайва ванил луттирду ххилтIу буллай, ххуй бивзмур ккалай, ишкапирттал хьхьичI креслорай щяикIан. Шиву ба­къасса журалул луттирду бакъая. Улу, ца хIужра бия спортрал луттирду буссагума. Яла ттухь ниттил Гулизардул бувсуна хъунбава институтраву дуклакиний, кутIасса манзилданий лечаврил соревнованиярттай гьуртту хьуну, чемпион хьуну бивкIшиву. Амма ванил та чIумал буллусса дипломру, кубокру яхьунумур бакъая.
Къатравун буххайсса, тIиртIусса ларзнил чIаравсса хьхьичI къатлуву хъунбу­ттал хIасул бувну бия музейраха лавхьхьу­сса к1ану. Шикку ванал ца чIирал лажиндарай, тIаннуя лахIунтту дурну, бивхьуну бия «ярагъуннищалсса» хъунбавал хъирив буллусса урша, ца дувссилул, цагу уттизаманнул кIива гунгуми, гайннулугу дия гара журалул ланжартту. ЧIарав бия ятIулсса телефондалул аппарат. Бия шиккува мукунма хъунбавал компьютер букканнин ишла буллай бивкIсса печатьная машина. Дия шикку личIи-личIисса лагрулул тIаннул тIабакьру, кавкил, синситIирал къусри. Улу, дия мюрщисса кIира щяпрая дурсса хъурзилугума.
ЧIаравсса треляжрал чIарах авцIуну нагу, нава цуксса хьуну урав ххал увайсса ххарссив дурссия. Гайннул чIаравгу цумур шин дуссаривгу чичайссия. Гьашину ттуха нава дагьанттувух урувгсса чIумал, чIалай ия ттуява янилун агьансса жагьил хьушиву. Цакьнира чIалай диркIсса чIаврдал ттаркIругу ттул дикI дирхьуну ккуркки ларгун дия. Яругу ттул хъунбутталсса кунма, ссавнил рангсса хьуну бия. БакIрайсса чIарамур ттул буттал Рамазаннул лахъи хьун къадиртун кутIа дувайва. Каруннал бювчIунбишивгу мадара хьуну бия. Гьарца шинал на ув­сса кьинилийн ттун хъунбуттал, хъунбавал арцу гьан дувайа лаххия ласун. Ми арцух ларсъсса лаххия – куртка, хIажак, кроссовки шяравун учIайхту, хъунбуттан ва хъунбавангу ккаккан дайссия.
Ттун мукунма ялагу хIисав хьуна, нава увкIсса кьинирдайва, ттула хасиятраву ссавурданий икIаву ххихьуну душивугу. Авазасса, цума инсан чун нани­ссарив къакIулсса битIикьукьулт кунма­сса шагьрулул инсантал, архну личIаврия ххари хъанай, рязину икIайвав. Шяраву цучIав щихунчIав ахчилачисса ишру янилун къабагьайва. Гьартасса дуниял. Лагма чIалачIисса зунттурдалгу дакIниву хъиннува гьарца иширал чулинмай умуд бутлатисса иш хIасул буллан бикIайва. Шагьрулий уний телевизорданивух щиллив ларсъсса тIабиаьтрал суратру ххал хъанай диркIхьурча, шяраву ттуламул яруннал хьхьичI дия ттуламур дуниял. Гъинттулгума архний чIалачIисса марххалттанул бакIурдищалсса зунттурдал хъиннурасса аьжаившивуртту чурххаву сакин дуллан дикIайва. Шагьрулий къабикIайсса ишгу ттун янилун багьуна. КIичIиравух ттучандалийн, базаллувун нанисса чIумалгума, шяраву хьунаавкьуманахь хъунасса, чIивисса икIу ссихI къадурккун чIарах уккан къабучIисса иш бикIайва. Вагу инсантурал культуралул иш бухьунссия. Шагьрулий циняв буссар дуцI бивкIун, щийннив, ссайннив ссибивзний кунма хъирив хьуну най. Шяравурив ттун ссибивзсса, рагьсса инсаннал симан янилун къадагьайва.
ХIатта, ца чIумал, на дахьа цалчинмур класс къуртал бувсса шинал, хъунбавахъал чIаххуврай яхъанахъисса Ясупи тIисса ттула оьрмулул оьрчIащал дус хьуну, хIала-гьурттуну, тайнначIа, жучIава тIуркIу тIий бикIайссияв. Яла цаппара хIаллава на тайннал цачIана уххан къаитлан ивкIунав, нузру лакьлай. Хъунбуттал бувсуна ттухь: «Му иширайн Арсен вин къаччан мабикIара. Зу тиву къатта-къуш лаялун буллай, лияннурду дуллай бусса буру. Мунияту кьатIухва тIуркIу тIутIияра», – куна. На яла къалагайссияв тайнначIан. Жул дусшивугу «ивзрав, уравлийн» кIура ларгуна.
Хъунбутта шяраваллия арх бакъа­сса вацIлул къаралчину зий ия. Ванайн «егерь» кунугу учайва. Щюллисса яннагу ларххун, генералнал куннасса тIакьагу дирхьуну, хъунбутта кьатIув увксса чIумал, ца исвагьийну чIалан икIайвахха, ттул дакIниву, укунсса хъунбутта ттула ушаврия пахру багьлангума бикIайва.
Жул, шяравалу, цурдагу дирхьуну дия тиягу-шиягу зунттурду бусса, даралул дянивсса хъун бакъасса щамарал бакIуй. Архния шяраваллих ябивтсса чIумал, ва ца караматну чIалан дикIайвахха, ваца шяравалу дирхьусса бакIу найрдал шалдануха лащайва. Амма цимил ургарчагу, циксса хIисав дулларчагурив «шал» чан къашайва. Хъунбуттал ганиннин бакIшяраву диркIсса цалами буттахъал къатригу уссурвавран кьадиртун, шяраваллил лагьний, баргъбуккавал чулий машина гьан, бучIан шайсса кIанай цIусса къатри дурну дия. Хъунбуттал къатри дусса кIанай дия цайминналссагу. Амма жулми къатри дия га махIлалул зума­къирагърай.
Хъунбуттал ва хъунбавал цалла къатравугу хIасул дурну дия шагьрулий куннасса шарт1ру: бия хIаммам, най дия дяркъусса, гъилисса щин къатравун. Хъунбуттал къатрал хьхьичIсса ахъугу ду-дакъасса ххяххиярттугу къадикIайва. Бия шиккува мукунма нисварти ва помидор бувгьусса багърал ца чулий, ганил утташиврул лагрулийх бувсса парникгу. ЧIаравва бия ттул буттал, Рамазаннул маслихIатрайн бувну, кIинналагу бувсса кIира-шанна метра утта-лахъи дусса къизил балугъру ябуллалисса, бетондалул чIирттащалсса хIавз. Гай щилчIав къабациншиврул, ялтту даркьуну дия муххал арматуралия дурсса, кьункьала дирхьу­сса сетка. Гивун мудан цIусса щин нанисса крангу бия. Гай къизил балугъру цивппагу шяраваллил хьхьичIух нанисса Хъун-Неххава бувгьуну, хIавзравун итабавкьуну бия. Ттул бутта Рамазан цувагу, хъинну балугъру ххирасса, чIун дирияйхту хьхьиричIан лагайсса балугъру бугьу ия. Жул шагьрулийсса цIурихьулувагу, цIусса балугъ чан хьун къабитайва.
Хъунбуттал ОьмархIажинал вацIлувун наниний буцайсса балчангу бия шаппа. Гъаттара, балчан бакьайсса ппаллу къатрайн лавну бакъаяча, кьанкь къадикIаншиврул, цахъис лавайну, ялтту чулий цанмалусса ппаллу бувну бия. Балчаннунсса ппалгу, тIювагу гъаттараппалния личIину, гайннулмур ппалнил чIарав, лахъсса, уттасса нузру дусса бикIайва. Га цуппагу айгъур бия. Хъунбуттал бувсуна, айгъур ттущал дус хьуншиврул, ганил чIарах наниний витIянхърай бивхьуну, качарданил касак хьхьичIун бугьан аьркиншиву. На мукун бувайссия. Яла на ххал шайхту, бакI лаяларай дуллай, цавай аьжаивсса чIурду буллан бикIайва. Качар букайхту, ялагу ттуйх цила щунщуматIи буклай: «Уттигу була качар» тIиний кунма бикIайва. Ганин Орлик тIисса цIа дия. Жу га хъунбуттащал ххартIи дуклай, марцIгу байссия. Къатрава гъили­сса шланграх щин нани дурну шюшайссия. Му чIумалгу га шланграва щин хIачIан кьацI бугьлан бикIайва. Буниялагу га инсаннал маз къукIулхьурчагу, жу дуллалимур бувчIлачIисса балчан бия.
Нагу цала махъ буртти ивтун, хъунбуттал уцайвав вацIлувун. КIийн вацIа бусса зунттул кьабакIравун бияннин, цахъис ялавайну бия, лахъсса мурхьирдал дянив егерьнал къаттагу. Га къатнил магъуйн лахъайсса чурттугу бия ца чулухух лавай. Хъунбутта га чурттуйх лавай лавхъун магъуй авцIуну дурламалувух уруглан икIайва лагмава. Ттухьхьунгу дулайва дурлама. Га цурдагу балчаннул кIиллухун бувтсса, бурчул къатлуву дикIайва дирхьуну. Гиккура къакьаритайва. «Къучитал шивун буххарча, бюхъайссар вайннал вассут дуван», – тIун икIайва хъунбутта.
На цалчин хъунбуттал къатлучIан увкIсса чIумал, ттун гиккусса ца иш­гу махIаттал бивзуна. Хъунбуттал вацIлувусса къатлувунгума чани бувцуну бия. Гиккун нанинийгу ттун чувчIав гиккун чани бувцусса ттуллу хIисав къавхьуна.
– Хъунбуттай, тталлу шиккун къанай бунува, ча наниссар шивун чани? – куну, на буллусса суалданихун, ца аьжа­ивсса пишлищал, ттул хъачIрай кагу дирхьуну:
– Техникалул замана бурхха Арсен. Шичча арх бакъасса, мурхьирдаяр лахъсса, тIивтIусса бакIуй буссар «солнечные батареи» тIий, бургъия нанисса чани салкьи буллай, яла гай жучIанма нани буллалисса иш, – куна.
– Хъунбуттай, инания буниялагу «крутойсса» инсан усса ура, – куссия нагу ганаясса ххаришиврул.
– Крутой, къакрутой къакIулли, амма вил хъунбавал Ххадижатлул шеърурду чичайсса пагьму бухьурча, нагу чIявусса затру кIулсса инсанна, – куна…
Ца чIумал ттул хъунбутта, цала даврил иширттай, шагьрулийн лавгуна. Нагу га кьини, Орлик гьухъаллинй бахIин лавгссияв кIюрххила. На учIаннин, хъунбава цIурихьулуву дукралуха зий дия.
– Хъунбавай, ина хIакьину хъунбутта акъа кьини дуван ччай дурав? – куну цIувххуссия. На бувсса хъярчгу хIисавравун къалавсун:
– Уттигъанну ттущала школалий дуклай бивкIсса душ-ихтиварнал бава диркIуссар. Мунияту мадара гьантри хьунни ганичIан къалавгунча, дукрагу дурну гьан ччай дура, – куна. На тачIав ганиннин шяраваллил кIанай кIурукъатлийн лавгсса инсангу акъаяв. Ттунгу мунияту ччан бивкIуна, ци иш бикIайсса бурив ххал буван, хъунбаващал кIурукъатлийн гьан.
Хъунбавал мантиваркалуву гьавалий шавхьуна дикIул ххункIру. Ларсуна кьурувату мураппалул банкагу. Гайннущал дирхьуна цилла дурсса печеньягу. Мураппа ва печенье дирхьусса пакет ттухьхьун буллуна. ХхункIру. чIивисса кIункIурдуву бивхьуну, гайннул лагмагу дастамал кай-кай дурну, сунклуву бивхьуна. Жу нанисса къатригу шяраваллил баргълагавал чулийсса махIлалий дия.
– Вайнна жува нанисса къатри, – куна хъунбавал. Яла жу кIилчинмур зивулийн нанисса чурттурдайх лавхъун, цIияллийн бувкссияв. Ганил хьхьичIгу дия цIияллил лахъишиврийхсса, мюрщисса чIавахьулттащалсса ларзу. Жу ларзулун буххайхту, ттул янилун дагьуна, чIиралу комодрай дирхьусса марцIсса, исвагьисса симандалущалсса, ттурусса хъюрухъ багьсса, цавай хъунисса яруннищалсса, жагьилсса хъамитайпалул сурат. Суратрал хьхьичIру бивхьуну бия тIутIал кацI. Га суратрал чIаравсса задиртталгу на махIаттал увнав. Ца чулух дия чIирисса, ххачпараснал диндалул, хъамитайпалул чIивисса оьрчIащалсса тIаннуй дирхьусса сурат. Гамур чулухгу, гара лагрулул, кьурандалул хIарпирдай чичрурду дурсса ула дия. Гай цирдагу дия га хъамитайпалул суратраяр ца­хъис лахъну, чIирайн лачIун дурну. Ттул бакIравугу хIасул хьуна хъунбавахь: «Та чIиралусса комодрай дирхьусса хъамитайпалул суратрал чIаравсса, ххачпара­снал диндалул хъамитайпалул суратралгу, чIаравсса кьурандалул чичрурдалгу ци тIиссар?» – тIисса суал. Амма жу ларзулун буххайхту, тIиртIусса нузардива бувккуна, ттул хъунбавал оьрмулувусса, бакIрая ччаннайн дияннин лухIисса лаххиягу лархсса хъамитайпа.
– Гьуй, ПатIимай, утти бавагу дакъа, зу бизар хъанай бухьунссарухха. Ттущагу ва, та багьана хъанай, мадара хIаллай бучIан къавхьуннихха, – куну, канихьсса сумкагу ларзнил хьхьичIсса столданий бивхьуну, ганийн хъямала багьуна.
Га ларзнил щала чIиралухгу бувну бия лавхъшану. Гиккугу, ганил ялувсса чIиралух бивхьуну бия кIараллу, тушакру. Лавхъшаний инсантал щябивкIун махъ, гайннал ччанну тIитIин бувни, вай ссурхъиралун бириян буллан бикIайшиву кIулну бия Арсеннун. Укунсса лавхъшанурду Арсеннун цайми шяраваллил инсантурачIагу ххал шайва. Ванал хъунбавахъал цIуну бувсса къатраву, укунсса лавхъшанурду бакъаяча, диванну, креслорду бивхьуну, шагьрулул къатраха лащан дурсса лази-лакьаву дия.
– Арсен, кIа комодрай дирхьусса сурат ва ПатIима ниттирссил нинури. Инагу ванихь жижара бува,– куна Ххадижатлул.
– Вихьхьунна цIуллушиву дулуннав ниттирссий, – куну, га лухIи лархсса хъамитайпалул ка дургьуна Арсеннулгу.
– Вагь Ххадижат вил тарбиялул иш бухьунссар ва оьрчIавугу. Ва иширах бургарча вил душнил арс урив къакIулли, – куна.
– Му МахIачкъалалив яхъанахъи­сса ттул душнил Гулизардул арсри. Гьарца шинал гъинттулсса каникуллай учIайссар жучIан, кумаг буллан. Гьашину ванал къуртал бувссар мяйва класс, – куна
– ЦIуллу аннав, вил хъамалу учIавугу, цайми инсантурачIан уххавугу, хъиншиврийсса дакъа къахьуваннав, – куну, Арсен цичIанай увну ганал чIаврайн ппай куна.
Арсеннул ва Ххадижатлул хьхьичI дагъ бувсса балугъгу бивхьуну, чяй дуван чайникгу бивхьуна. Арсеннун хъинну махIаттал дирзун дия суратрал чIаравсса лишанну. Мунияту ганал ПатIима ниттирссин къабаянну, хъунбавал вичIилухун кьус ивкIун: «Хъунбавай тай суратрал чIаравсса кIира лишандалул цитIиссар?» – куну цIувххуна. Яла, Ххадижатлул пишгу куну, ПатIимахь:
– Ва душнил арс цIухлай ур суратрал чIаравсса лишаннал цитIиссар? – тIий. Ванахьгу бусан багьанссар вила ниттия, – куна.
– Циванни къабусайсса, хъинну ххарину бусанна на вихь Арсен, – куну, ПатIимал бувсуна цила нитти-буттаясса кутIасса хавар.
– Ургу Арсен, ччянира ларгмур аьсрулул дязаннив жула шяраву хьуннав, лагмасса щархъурдай хьуннав оьрчIахь дарсру дишинсса учительтал къабивкIссар. Хъун дяъвилуву гьуртту хьун лавгун бивкIсса чIявусса учительтал дяъвилува зана къавхьуссар. Мунияту жучIанма Аьра­сатнал цайми улкрая букIлай бивкIссар учительтал. Ми чIявумигу бивкIссар жагьилсса душру. Ттул ниттийн Мария Сергеевна учайва. Яла махъ та ттул буттан, аьпа бивун, МахIаммадлун щар хьуну, бусурман дин кьамул дурну махъ Марзият чайва. Фамилиягу жул МахIаммадовхъул тIисса дур. МахIаммадова Марзият Сергеевна учайссия ттул ниттийн. Танил циллагу оьрус мазрал ва литературалул дарсру дишайва. Учин мукъун, вил хъунбавая ттул ниттиллихха шаэр бувссагу. Вихь ванил цуппа шаэр цукун хьуссариввагу къабусайрив? Танил чIаравсса ххачпара­снал ва бусурманнал диннал лишаннугу, танил оьрмулуву диркIсса кIира дакIнил кIункIу тIаву хьусса иширттан хас дур­сса лишаннур, — куна.
– Ттул хъунбава мудан кушурдаха зузисса инсан бур. Къатта-къуш марцI буллай, цIурихьулуву дукрарду дуллай, яла гъаттаралссагу буллан бикIай. Хаварду ттухь хъунбутталли бусайсса. На ганащал вацIлувунгу лагайссара. Къатрал хьхьичIсса ахъуву дургьуминнуйн щин рутIин, кказа буван, уртту дурчIингу на кумаг бувайссар. Ттучандалийнгу гьан увара ца-ца чIумал аьркинмур ласун, – увкуссия на.
ЧIал къавхьуну хъунбавал ва ПатIимат ниттирссил цала хаварду къуртал байхту, жу шаппай бавчуссияв. Ххуллийх най бунува ттула мицI мазрайн бивсса суалгу на хъунбавахьхьун буллуссия.
– Хъунбавай ина цукунна ПатIимат ниттирссил ниттил шаэр бувсса? Инсантураллив шаэртал байсса? – куну.
– Ургу Арсен, инсан дунияллийн увксса чIумалва ганаву бикIайсса бур Аллагьнал бивхьуну хъинну чIявусса пагьмурду. Мунияту мюрщиний оьрчIру цала пагьмурду ссаву буссарив бувчIин къахъанай, ва хъиннивав, та хъиннивав тIун бикIайсса бур. Яла школалийн занан бивкIун махъ, оьрмулул ишру канилух бувксса учительтуран чIалан бикIайссар, цума оьрчIаву ци гьунар бу­ссарив. Муна му чIумал учительтуралгу ккаккан буван аьркинссар миннан тIайламур ххуллу. ТIайлар, чIявуми мукунсса маслихIатрахгурив вичIи дихьлан къабикIай. На ряххилчинмур классраву дуклакисса ч1умал кIарттуву ччатI баншиврул, цIу дирхьуну буссияв. Га цурдагу баргъ ларгсса, цIан щяв дагьлагьисса чIун дия. Яла ттун щив-щив тIисса кIюххигу, кIарттуву ччучлачисса мечIал кьяртал чIугу, кIарттул хьулува ттула никирттайн багьлагьисса чаннал липI-липI тIавугу, чIаравсса цIаннал кIучI дуллалисса цIиялугу махIаттал дирзуна. На яла хьхьувай гай ттунма асар биян бувсса иширттая кIива-шанма куплет чивчуссия. Гай махъру бусса чIапIи дия ттуща оьрус мазрал дарсирал тетрадьраву лирчIун. Яла шардай дуллу­сса задание ххал дуллай бунува, ПатIимал ниттин, Марзият Сергеевнан, дия га бакIрайн дагьну. Ганин гай ттул махъру бия ххуй бивзун. Яла ганил ттухь вания чича, тания чича тIий на шеърирду чичлачи бувайвав. Муна мукун байбивхьуна ттул шеъриятрачIансса ххуллу. Муниятур ПатIимат ниттирссигу вихь цила ниттил ттуяту шаэр бувссар тIий бивкIссагу, – куна.
Ттун нава шяраву хъунбавачIа ва хъунбуттачIа гъинттул гьан байсса барзру лащан буван ччан бивкIуна ца ишираха. Шагьрулий яхъанахъисса инсантурал оьрму, неххайх лахълахъиний, къаехърай щябивкIун гьузуй нанийни кунману чIалай бия. ЧIявумур чIумалгу цивппагу чIявукIулну, къуса,чIатIрах къаехъ дачин дурну наниманангума кумаг къабуллай. Гьай-гьай, гай бияй нанинийн. Гайннал чурххардиннив кIул хъанай дакъар къаехъчинал кьирийн уккаврил ххаришиву. Шяраваллил кIанай яхъанахъима ия ттун щин чансса неххайх лахълахъиману ч1алай. Му чIумал ганал ччаннайн щилай буссар щинал нани бувсса чIучIри, ччаннал бювчIунбишивгу буссар щинал бякъин буллай. КIул хъанай дуссар щинал анаваршивугу, ганил цува неххавун утан ччай бушивугу. Га уссар гай щинаяр ух къахьун яхI буллай, ца зумания тамур зуманив лахъан, ххассал хьун хIарачатрай. Тийн ияйхтугу, ганал дакIниву дуссар караматсса ххаришиврул видурцIусса тагьар. Вана ва нех лархъни куннасса ххаришивурттал ттулмур дакIгу дурцIуну дия август зурул ахирданий, шагьрулийн нанисса маршруткалуву щяивкIний.
Вихьул
2021 ш.