ДакI ххари шай, жула лакку оьрчIал билаятрал ларулий хьун дурсса хьхьичIуннайшивурттая баллалийни, вайннал пагьмурдал машгьур дувайну тIий миллатрал цIагу, кьинигу.
Ттигъаннугу ххарисса хавар бавунни Санкт-Петербурглия: тикку Репиннул цIанийсса художествалул академиялул студент ХIабибуллагь МахIаммадовлул, ЯтIул дипломрай академиягу къуртал бувну, ххаллилну дурурччунни дипломрал проект.
А. АхIмадова
Увну ур ХIабуллагь Карашатусса Артиклул ва Байзанатлул кулпатраву. Байзанатлул къуртал бувну бур Буйнакскаллал педагогикалул училище, яла МахIачкъалалив – ДГУ-лул тарихрал факультет. ЦIана ва зий бур МахIачкъалаллал 26-мур школалий учительну. Ппу Артик, Политехнический университетгу къуртал бувну, зий ур инженер-программистну. Вайннал кулпатраву бур шанма оьрчI – кIия арс ва ца душ. ХIабибуллагь ур дянивма, ванал язи бувгьуну бур скульпторнал пиша.
ХIабибуллагь увну ур 1994-ку шинал. МахIачкъалаллал 26-мур школа къуртал бувну махъ дуклан увххун ур Дагъусттаннал паччахIлугърал Жамаллул цIанийсса художествалул училищалувун, тIаннул-чарил ва ттурчIал давуртту дан лахьхьайсса факультетрайн.
[dropcap]Н[/dropcap]иттил бусаврийн бувну, ХIабибуллагь чIивинийва гъира бусса ивкIун ур канил давурттах. «Ца чIава модельер-за хханссия, вания та, тания кIа дуллай, оьна къаацIайва, – тIий бур Байзанат. – Дуклан уххавугу ванал цала дакIнивусса гъирарацIун ва дуллалимуницIун дархIусса язи дургьунни.
Пахру-ххара бакъасса, лухIисса хъюрухъ багьсса кIизгу, ттюнгъасса пишгу сипатрай бусса, хьхьичIазаманнул рыцарьнал куннасса хасиятрацIун училищалуву ванайн «Черный принц» учайсса бивкIун бур. Тарбиялувугу, дуккавривугу хьхьичIун ливчусса студент преподавательтуралгу мудан эбратран ишайсса ивкIун ур. Цаламур факультетрай ласласисса кIулшивурттай гьашиву къадурну ва модельертурал, живописьрал, дизайндалул лекциярдайгу гъирарай щяикIайва тIий бур.
2013-ку шинал Дагъусттаннал художествалул училище ванал ЯтIул дипломрай къуртал бувну бур, диплом буруччингу дурну дур горельеф: зунттавусса багъ, утта-кIюласса ххуллийх цIийннарал къар ларсун нанисса ттукку, ттуккуйгу – чIивитIу. ХIабибуллагьлул даву ккалли хьуну дур та чIумалсса дипломирттал давурттаву ца яла хьхьичIунмурну. Комиссиялул председательнан най унува ХIабибуллагь кьамул увну ур ДГПУ-лул художествалул графикалул факультетрайн. Амма, дуккаврихсса мякь хъиннува ххи хъанай, Санкт-Петербурглив академиялувун уххансса умудрай ивкIун ур ва.
– Арснавусса дуккаврихссагу, даврихссагу гъира-гьавас чIалай, къабахчуссияв, дуклан нанийни. Ниттихъал мурад оьрчIал оьрмулуву цала ххуллу-хха ласавур.
– Ттул арс , ина зунттал барзу куна бигьану гьаз хьун ччай ура, гьаз хьун бигьассар, гьаваллаву ца тагьарданий ацIанни захIматсса тIий буссияв, махъаллил шайрив ккаккан, – тIий бур Байзанат.
ХIабибуллагь тIурча, цала тIимуний кьянкьану авцIуну ур. 2015-ку шинал Санк-Петербургрлив лавгун, документру буллуну бур цал архIал кIива вузравун – Мухиннул цIанийсса художествалул училищалувун ва Репиннул цIанийсса художествалул академиялувун, гьай балики тIайлабацIу къахьурчагу тIий. Кьамул увну ур кIиннивунагу. АвцIуну ур Репиннул цIаниймур академиялий.
Цала язи бувгьусса ххуллийх дакI дарцIуну хьхьичIунай нанисса ХIабибуллагьлул мурадгу щаллу хьуну бур. Дусталгу хьуну бур, дуккавугу нирхиравун дагьуну дур. Гьай-гьай, цIусса хияллацIун, пикрирдацIун ва бихьлахьисса захматрацIун ва хьхьичIунгу ливчуну ур. Конкурсирттай, выставкарттай ванал дурсса давуртту мудангу хьхьичI ххуттай диркIун дур. Ванал дурсса «Репейник», «ХIажи-Мурад», «Бартбису», «Ися Идавс ххач кIункIу буллай», «Яруссаннал жалин» – лавайсса даражалул давурттан ккалли хьуну дур.
ДукIусса шинал аьркинну бивкIссар ХIабибуллагьлул дуккаву къуртал дурну, димлом ласун. Амма, ковидрал къашавай хьуну, ца шинайсса академический отпуск ласун багьну бур. Гьашину тIурча, академиялуву бивхьусса захIмат бартлавгунни. ХIабибуллагьлул диплом буруччин язи дургьусса даву, Аьрасатнал лайкь хьусса тренер, чемпион ХIабиб НурмахIаммадовлул ппу «Аьбдулманап НурмахIаммадовлуцIун» дархIусса проектран комиссиялул лавайсса кьимат бивщуну, ванихлуну Мусил медаль хIалал дунни. Комиссиялул кIицI бунни академиялувусса профессортурал-преподавательтуралгу лавайсса кьимат бивщушиву жагьилсса скульпторнал даврин.
Дагъусттаннаясса гьунар бусса скулптор барча уван Санк-Петербурглив ХIабибуллагьлул дипломрал презентациялий гьуртту хьунни тиккусса ДР-лул поспред ХIасан ХIасанов. Ванал барчагу увну, чIа увкунни жагьилсса скульпторнан давриву тIайлабацIу.
ЦIана ХIабибуллагьлун дур 28 шин. Ванияр тихунмайсса ххуллугу бахIин ччай ур вава академиялуцIун. Гьунар бусса, пахру бан лайкьсса скульпторнал хьхьичI тIивтIуну бур чаннасса, цIу-цIусса хьул-умудирттал ва творчествалул илкинсса ххуллу.
