Июньдалул 25-нний МахIачкъалалив, Р. ХIамзатовлул цIанийсса Национал библиотекалий, хьунни Шахьуйннал шяравасса художник-педагог МахIаммадова Аьйшат (Ася) АьлихIажинал душнил дирхьусса суратирттал «Уходящая натура» тIисса цIанилусса выставка тIитIлатIисса батIаву. Выставка сакин дурну дия ДР-лул Культуралул министерствалул ва М. Жамаллул цIанийсса Дагъусттаннал художествалул училищалул.
Шадлугъ дачин дурну ия Дагъусттаннал художествалул училищалул директор Мухтар Камбулатов. Махъру лавхъуна цIа дурксса художник Наталья Савельевал, хасну ва выставкалийн Гуржиянава бувкIсса Аьйшатлул ччянивасса дус Розанна Сихарулидзел, журналист Зара Рудневал, Художествалул училищалул преподавательтал Жанна Парамазовал, Узари Мадаевлул, Аьйшатлул гъан-маччаминнал цIания ванил уссил душ Роза МахIаммадовал ва мукунма цайминналгу.
Выставкалий дия авторнал чIаванийва, училищалуву дуклакисса чIумал, дирхьусса, махъ, институтраву дуклакисса чIумал, дурккуну къуртал хьуну мукьах, дирхьуссагу суратру. Экспозициялий хъунмасса кIану бугьлай бур авторнал буттал шяраваллил пейзажирттал. Вайннуву, ва кьини махъру лахълахъиминналгу кIицI лавгсса куццуй, щуркIал хъанай дия авторнал буттал шяраваллихсса ляличIиссара ччаву.
![](https://ilchi.info/wp-content/uploads/2022/07/IMG_0499-e1657115002140.jpg)
Выставкалун «Уходящая натура» тIисса цIа дизаву автор бувчIин буллай бур укун: «Ва оьрмулуву цимурца дур чIумуйсса: инсантал лагай, вайннан кIанай бучIай цайми, бухми къатран, зданиярттан кIанай бувай цайми… Художникнал буржгу – вай цимурца абад дувавур, чIун, дацIан дурну, хъиривми никирттачIан диян давур». Выставкалийсса давурттаву дия «Уходящая натура» тIисса цIанилусса суратгу, ваний Шахьуйннал шяраваллил махIлардавасса цаннил кIичIиравух ларай мукьавсса гьивулул кIушиврулу кьусгу диркIун нанисса къари-бава дур.
Аьйшат бувну бур 1955-ку шинал августрал 6-нний Къазахъисттаннай Шахьуйннал шяравасса МахIаммадов АьлихIажинал ва Кандаева Розал кулпатраву. Аьйшатлун 2 шин диркIун дур Дагъусттаннайн, Лаккуйн, бивзсса чIумал.
Буттал шяравувасса школалий 4 классгу къуртал бувну, Аьйшатлул школалийсса гихуннайсса дуккаву дурну дур Тарумовкалий. Гихунмай бувккуну бур М. Жамаллул цIанийсса Дагъусттаннал художествалул училище (1977 ш.), ДГПУ-лул художественно-графический факультет (1991 ш.) Училище бувккуну махъ ца шинайсса зий бивкIун бур Избербашрай художествалул школалий, МахIачкъалалив личIи-личIисса кIанттурдай художник-оформительну. Педуниверситет бувккуну махъ,1991-1999-ку шиннардий, зий бивкIссар Избербашуллал педагогический училищалуву, художествалул отделениялий дарсру дихьлай. 1999-ку шиная шийнмай Аьйшат АьлихIажиевна зий бур Художествалул училищалуву, «живопись», «рисунок», «цветоведение» спецдисциплинарду дихьлай. Цимилгу гьуртту хьуну бур личIи-личIисса выставкардай. Ванил дирхьусса суратру дур частный коллекциярттаву.
Сурат дишаврихсса гъира, гьунар ваниву чантI увкуну бур Грековлул цIанийсса Ростовуллал художествалул училищалул скульптурное отделениягу бувккуну, гихунай цалва пишарахун агьсса ниттиуссу Кандаев ХIусайннуйн бувну.
Выставка лахъи лагантIиссар июльданул 24-ннин.