Булбул Оьмариева

КIулли

Къазразанну бур кIулли,
Дакъар тIар къатрал кIулли:
Къаляхълай цалла кIулли,
Луглай, лечлай бур кIулли.

Ккавкривгъартал жул кIулли,
Гьарнахь бур цIухлай кIулли,
Къаккарккунни, къакIулли,
Ци дурссарив щин кIулли.

Ва ци ишрив цикIулли,
ЧувчIавгу дакъар кIулли,
Щин лярхъссарив цикIулли,
Чунни тти буххан кIулли?

Шикку аьй дур Аьвдуллай,
Га ур кIулли къадуллай:
Аьжаивну хъягу-хъяй,
Ялун увкIуна Ахъай.

Циван урар, Аьвдуллай,
Ина кIуллай аьй дуллай,
Дула ми къатрал кIулли,
Бяхълай бурча вай кIулли.

Паракьат бара кIулли,
Ми ляркъума ттун кIулли.
Ххарил ливтIуна кIулли,
Ляркъуну къатрал кIулли.

Аьвдуллайгу аьй дуллай,
Ахъай уссар ттигу хъяй,
Цахьра дуна гай кIулли
ТIий ивкIун ур къакIулли.

ЧIакъягъу

ЧIакъягъу бур
Къя-къя тIий,
ЧIавахьулу
ТIитIа тIий.

Ци тIий бурагъар, къягъуй,
Аьлагъужа цир магъуй?
Май цIий бур тIий бур къягъу,
Бан ччай бур тIар май аьгъу.

Агь, къягъул май,
Къягъул май,
Насула тти тихунмай.

Къари-бава-къабалай

Къар-къурвагу къабаллай,
ЩядиркIун дур къабалай,
Къари-бавай — къабалай,
Къахъина чIу къабаллай.

Агь, къахъина къахъина,
Къахъина чIу къабаллай.

Къувлул шаний къадакьлай,
Къюллул шанувун духлай,
Къатланнагу къахъанай,
Къари дуссар къашанай.

Агь, къахъина, къахъина
Къари бава къашанай.

Янин чани чан хъанай,
ВичIилун чIу къабаллай,
Шаний дуна къашавай,
Къари дуссар къашанай.

Агь, къахъина, къахъина
Къари бава къашавай.

Ажду ажари

Ажарий, ажарий,
Э-оь учала,
Чани шавай дурча,
ЧIукIа къур бала.

Лахъ бува, лагь бува,
Лахъигу бува,
Циняв шанай бурча,
ЧантI учин бува.

БакIхъахъуй, хъаругу
ХъарацIа тIитIа,
Хъазамгу гьаз бувну,
Хъит-шитгу уча.

Ссятгу пикри буллай
Цурда дитича,
Гюргу тIисса балай
Цал ттигу уча!

Бажанаттукку

Цакун Бажана
Ттукрайн,
БакIуха бюрх
Ххявххуна.
Бюрххуща ххивну,
ттукри
Ххяллайх ххяхлай
Ливхъуна.
ОьрчIру чIарах
Бувккуну,
Бюкьру бишлан
БивкIуна.
Щилай бурхIардийн
Бюкьру,
Миннуйгу хьуна
Тюкьру.

Къюллул къавтIи

КъюллуцIух цIу ларчIуна,
КIуллул нуххув дагьуна,
КIулли, кIувравух бувккун,
Гассят кьатIув ххявххуна,
Лархъсса цIарай ччан бивзун,
КIуллул чIанччан ччувччуна,
КIуллул ччан ччувччунни тIий,
Кьяцлул чIири бивттуна.
Цуппагу ччуччара тIий,
Шатлул ккири ливккуна,
ПуркIуврал кIу бунну тIий,
Циняв кIулли кьатI хьуна.
КIулли кIукIлу бувну тIий,
ХъатIри ялун ххявххуна.
Хъяхъаврил кIукIлу бувну,
Ччитумур щяв багьуна.
Чимусул бакI бивхьуну,
Ччувччусса ччан бавхIуна,
Лаччул ккарччул ца лиссу
КIуллун ккухIин дуллуна.
Микку кIулу хъин хьуну,
ТIанкIру дуллай лавгуна.

1