Июньдалул 16-нний Петербургуллал Дунияллул халкьуннал экономикалул форумрал кIилчинмур кьини Дагъусттаннал БакIчи Сергей Меликовлул, гьурттугу хьуну, махъгу лавхъунни «Туризм: ЦIусса трендру, цIусса бюхъурду, цIусса ххуллурду» тIисса стратегиялул сессиялий. Муний гьуртту хьунни Ростуризмалул каялувчи Зарина Догузова, цаппара улкрал бакIчитал.
Сессиялий ихтилат буллай, Сергей Меликовлул бувсунни туризмалул аралувусса Дагъусттаннал хъунисса каширдая. Мунал тIимунийну, инсантурал хъунмасса хIаз ласлай бур республикалий бигьалагаврия ва дакIнийхтуну хIадурну бур цIунилгу бучIаван региондалийн бигьалаган. Дагъусттаннал БакIчинал бувсунни виваллил туризмалуву тамансса лябукку хьуну бушиву ковидрал ссуссукьушивурттал чIумал ва кIицI бунни лябуккулунсса давуртту дацIан дитан къабучIину бушиву.
Региондалул каялувчинал ляличIину къулагъас дурунни туризмалул глемпинг журалух. Му журалул туризмалий гостиницарттан кIанай ишла байссар анаварну батIайсса конструкцияртту. Миннуву бикIайссар хъамаллуран цинярда шартIру дусса къатри.
Сергей Меликовлул бувсунни туризмалун аьркинну бушиву дурккусса, цалла даву хъинну кIулсса пишакартал, гидтал, экскурсоводтал. Мунал бувсунни ми хIадур буллан аьркиншиву дуккаврил идарарттаву.
