Гъан хъанай дур цIусса дуккаврил шин. Къуртал шавай дур «Модернизация школьных систем образования» тIисса федерал программалул лагрулийсса дуккаврил идарарттал капитальный ремонт.
Дагъусттаннайгу хъуннасса къулагъас дуллай бур ва программалух. ДР-лул премьер-министр Аьбдулмуслим Аьбдулмуслимов цува иллай ур ремонт нанисса школардайн. Министртурайнгу тапшур бувну бур районнай ва шагьрурдай ремонтрал давуртту цукунсса тагьарданий дурив ялтту буккан.
Зулайхат Тахакьаева
Ларгсса нюжмардий Ккуллал райондалул школардал ялтту уккан увкIун ия Дагъусттаннал жагьилтурал иширттал министр Камил Саидов.
Вай гьантрай райондалул КIулшиву дулаврил управлениелул каялувчинал буржру биттур буллалисса Аминат Къянчиеващал нагу бивра ремонтру нанисса школарттайн.
Федерал программалул лагрулий Ккуллал райондалий бакьин буллай бур ххюва школа: ЦIущардал, Хъювхъиял, Хъусращиял, 1-мур ЦIувкIуллал ва Ккуллал.
Шиккува кIицI бан, райондалий цавагу школа бакъар республикалул «150 школ» программалувун къабагьну ливчIсса. Амма ва программалувун багьну бур так ца-ца корпусру.
Ми ремонтру къадурну ливчIсса корпусру ремонт буллай бур ларгсса шинал зузи дурсса дуккаврил идарартту цIу буккан баврил ялувсса федерал программалул лагрулий.
Ккуллал райондалул МБУ ЖКХ-лул строительстволул отделданул инженер Онегин Аюбовлул бусаврийн бувну, ххювагу школалий цIу дурну дур ялттусса магъив, гипсокартондалул даркьуну дур вихсса магъив, даххана дурну дур поллу, нузру ва чIавахьултту.
Дирхьуну дур отопление, цIу дагьаврия мюхчан бансса сигнализация, цIу дурну дур ттукрал ххаллу.
Му бакъассагу, дуккаврил идарарттайн дуркIун дур ттизаманнул матахI, интерактив доскарду, ноутбукру.
Хъусращиял школалий, ялув кIицI ларгсса давуртту дакъасса, цIу дурну дур фасадгу. Школалул ялавайми классирттал корпусраву ремонт дан итадаркьуну дур 3, 5 млн. къуруширттал. Объект тапшур буллалийни райондалул ва шяраваллил администрациярттал зузалтращал гьуртту хьуну бур дуклаки оьрчIал нину-ппугу.
– Махъ бакъа, школа капиталныйну ремонт баву щала шяраваллил оьрмулуву хъинну агьамсса иширан ккаллиссар. Школа цIу буккан баву шяравалу хьхьичIуннай шаврил ххуллийсса ишри, –тIий бур Хъусращиял школалул директор Гулайбат ХIажиева.
Хъювхъиял школалий ремонт дан итадаркьуну дур 3 млн къуруширттал. Ремонт дурну дур «Эко-Плюс» ОО-лул.
– Ва федерал программалул къулайшиву ссаву дур чирча, ремонт ва школалул инфраструктура цIу дуккан даву дакъасса, ва программалувун дагьлай дур шяраваллил кIанттай зузисса учительтурал пишакаршиву ларай дансса давурттугу. ДакI дарцIуну бура цIу буккан бувсса школалийн занан бивкIукун, дуклаки оьрчIал дуккаврихсса гъира ххи хьунтIишиврий, – тIий бур Хъювхъиял школалул директор Аьйша Исяева.
