СуцIурдища бурувччуну бикIира
Цуппа чIивинугу, суцIлил биян буллалисса зараллу биялсса бур – инсантурангу, ятту-гъаттарангу. Мунияту, ххину-ххишалану мугъаятну бикIан аьркинссар мяйра ччан ду оьттухIачIуя.
Мюрщи вампирду
Цияра суцIлия нигьачIишиву дакъанугу, ва хъанахъиссар инсаннал цIуллу-сагъшиврун нигьачIишиву дусса вирусру лахъан дувуну. Ччай-къаччай, оьттувун дагьсса вирус сававну инсан инжит хьун бюхъайссар.
Ва ишираву мюрщи оьрчIан хъиннура хъуннасса нигьачIаву дуссар. Паркраву, шагьрулул кьатIув, шяраву, чув-бухьурчангу, мюрщи оьрчIан ххирар щяв урттуй, аьрщарай, къундалий тIуркIу тIун. СуцIурдин яла ххирами кIанттурдугу паркру, вацIри, зума-къирагърур.
Цири суцIурдин къаххирасса?
СуцIурдин къаххирассар эвкалиптрал ва михакрал (гвоздика) кьанкьру, мунияту, паркравун, вацIлувун нанийни, ишла дувара вай журардал аьгъушивуртту. АьпттикIрая ларсун, эвкалиптрал ягу михакрал аьгъушивуррул ца чяйлул къуса 150 мл щинал хIисавну хIала дурну, ми щин пурх дувара чурххал чIалачIими базурдайн, зува щябикIан лув-ялув дутан нанимунийнгу, лагма-ялттугу.
Вайннун къаххирасса уртту-тIутIигу дусса дур: мисалдаран, кIяла тIутIул (ромашка) цаппарасса журарду, пижма, лаванда, розмарин, машаку, ттуккулцIу, лаччи.
Лаххира чаннасса янна
КьатIув тIабиаьтрайн нанисса чIумал, бюхъавай, лаххира чаннасса янна, суцI лавхъун бачирчангума му кьутIиннин хIисав хьун бигьану бикIаншиврул.
Къатлуву суцI аглан къахьуншиврул
КьатIату ччитуйн, ккаччийн лавхъун бигьанма хIаятравун, къатлувунгу багьан бюхъайссар суцI. Къатта лакьлакьисса чIумал аьркин дуллалисса щинавун (ххит лишин, пол шюшин) бутIара ларай кIицI ларгсса аьгъушивурттал цаппарасса кIунтIру.
СуцIлил кьацI увкухьурча, хIакинначIан гьан аьркинссар
Агарда ччай-къаччай суцIлил кьацI увкухьурчагу, азарханалийн, хIакиннайн буккира. Зуйва суцI лякъирча, мугу бюхъавай зува буцан мабулларди, агарда зунна му даву тIайлану дувайсса куц къакIулхьурча. СуцIгу буцан буван, муния махъ аьркинмургу дуван инфекцион азарханалийн насира. Агарда суцI зува буцан буллай бухьурча, му лавчIун бивкIсса кIанайх чара бакъа спирт, йод ягу зеленка дуккира.
