Дагъусттаннал паччахIлугърал опералул ва балетрал театр хIадур хъанай бур Расул ХIамзатовлул «Буруччара ниттихъул» тIисса поэмалийн бувну сакин бувсса вокалданул ва хореографиялул спектакль бишин.
Театр ва даву щаллу дуллай бур «Творчествалул инсантал» тIисса цIанилусса федерал проектрал лагрулий «Аьрасатнал культуралул фонд» ООГО-лул грантрацIух.
Спектакль хIадур баву дархIуну дур Дагъусттаннал халкьуннал шаэр Расул ХIамзатовлун 100 шин шаврил таварихрацIун.
Ва хъанахъиссар хъунасса шаэрнал ххаллилсса произведение уттинин къабивкIсса, тамашачитуран уттинин къаккавксса куццуй ккаккан бансса хIукмуну.
Спектакльданул премьера хьун аьркинссар ссуттихунмай, ноябрьданий.
