[dropcap]И[/dropcap]юньдалул 5-нний МахIачкъалалив Художниктурал союзрал залдануву тIиртIунни гьунар бусса художник Ажув Къячаевлул цаллалусса цалчинсса «Стаффаж-у» тIисса цIанилусса выставка. Ккаккиялун дирхьуну дия художникнал личIи-личIисса шиннардий дирхьусса графикалул, живописьрал, полиграфиялул давуртту.
[dropcap]В[/dropcap]ыставка тIитIлатIисса шадлугъ дачин дурну ия ДР-лул Художниктурал союзрал Выставкартту дай залданул директор Амирхан МахIаммадов.
Шадлугърай махъру лавхъуна Художниктурал союзрал председатель Кьурбанаьли МахIаммадовлул, Аьрасатнал лайкь хьусса художник Зулкьарнай Рабадановлул, «Дараччи» фондрал каялувчи Гульшан Хасаевал, М. Жамаллул цIанийсса Дагъусттаннал Художествалул училищалул директор Мухтар Камбулатовлул, журналист АьвдурахIман Юнусовлул, Республикалул ЧIяру профиллал лицейрал директорнал хъиривчув Борис Ханукаевлул, Дуккаврил ва методикалул центрданул директорнал хъиривмур, художникнал хъинирву Нана Мащилиевал, Дагъусттан Республикалул халкьуннал художник Апанни МахIаммадовлул ва цайминнал.
Выставка тIиртIуну дикIантIиссар дурусну ца зуруйсса – июльданул 5-ннийнин.
Махъру лахълахъими кIицI лаглай бия Къячаевлул творчествалул гужирал луртан, цимивагу журасса гьунарду, щихачIав къалавхьхьусса хатI, чIурчIав дуллай бия ва ххаллилсса иллюстратор, художник-педагог ушиврий. КIицI лаглай бия ванал суратирттал щаллу бувсса хIат-хIисав дакъасса луттирду, журналлу, хаснува оьрчIанми.
Увну ур Ажув МахIачкъалалив 1963-ку шинал Гъумучатусса педагогтурал Ибрагьим ва Камилла Къячаевхъал кулпатраву.
[dropcap]О[/dropcap]ьрчIнияра ххирану диркIун дур ванан сурат дихьлан, занай ивкIун ур Пионертурал къатлувун кружокрайн, махърив – художествалул школалийн. М. Жамаллул цIанийсса Дагъусттаннал Художествалул училищалуву дуклакисса чIумал, ванахь дарсру дихьлай бивкIун бур язисса педагогтал: П. Куцевич, Т. Веселова, А. Марковская ва м.ц.. Художествалул училище къуртал бувну махъгу жагьилнаву творчествалухсса ччаву ялу-ялун гуж хъанай диркIун дур. Ватандалул хьхьичIсса цалва бурж лахъан армиялийнгу лавгун, занахьуну, цаппарасса хIаллай Луттирдал ва журналлал комплексрай печатникну зийгу ивкIун, Ажув 1986-ку шинал увххун ур И. Федоровлул цIанийсса Украиннал полиграфиялул институтравун (цIанасса Печатьрал академия). Ва хъинну сийлийсса вузран ккаллину бивкIссар, щалагу Совет Союзрай укунсса кIивар бивкIсса – Москавлив ва Львоврай. Ва шагьрулий ларсун дур ванал полиграфиялул ххуйсса кIулшивуртту.
Уттинин Ажув чIявуссалийла гьуртту хьуну ур личIи-личIисса выставкарттай. Цаллалусса цалчинсса выставкалунсса цIанил ялуврив ванан хъунмасса хIаллай пикри буллан къабагьну бур – «Стаффаж-у». Цири тIисса ва аьжаивсса, нажагь бакъа къабаяйсса мукъул?
– Стаффаж – му сурат фигурарттайну (инсантурал ягу жанавартрал) чIюлу даву тIиссар. Пейзаж утта буккан баншиврул, суратрал масштаб ххи баншиврул ишла дувайссар ва прием. Ттун хIисав хьунни нара ттулла творчествалуву чIяруну ишла дуллай ушиву ва художествалул прием. Мукун, выставкалул цIагу цийнура цурда щаллу хьуна. Хъиривва хIисав хьуна ва ттулла цIаницIунгу даркьусса душиву, личIлай бия ахирданийн так «у» хIарп ххи дуван. Укун, ттулла выставкалий нава стаффажну хьунна, яни, ванил букъацай бутIану», – тIий, буслай ур цува художник.
Выставка тIиртIуну дикIантIиссар дурусну ца зуруйсса – июльданул 5-ннийнин.
