Москавлив Лавайсса даражалул экономикалул школалий (ВШЭ) хьунни Дагъусттаннал культуралул вечер. Мероприятиялий гьуртту хьун, студентътуращал хьунабакьин бувкIун бия «Дагестан» МЦК-лул президент Арсен ХIусайнов, центрданул вакилтал Ххадижат ЦIаххаева ва ПатIимат Садыкова, М.Илиясовал цIанийсса «Дараччи» ихIсандалул фондрал президент Гульшан Хасаева ва фондрал вакил Шовлукь Илиясова хIаласса делегация.
Шиккун оьвкуну бия Москавуллал личIи-личIисса вузирдаву дуклакисса Дагъусттаннаясса студентътурайнгу.
Зал чIюлу бувну бия Дагъусттаннал сянатру ккаккан дуллалисса стендирттал. Вечерданул сакиншинначитал хьунни «Высшая школа экономики» НИУ-лувусса Дагъусттаннал студентътурал землячество.
«Укунсса Дагъусттаннаясса студентътурал ккуранну дуссар Москавуллал чIявуми университетирттаву. ХьхьичIва, шийх Дагъусттаннаясса студентътал чансса бусса чIумал, «Дагестан» МЦК-лучIа дурагу ца ккуран дуссия – «Жагьилтурал ассоциация». ЦIанарив шийх 5 азарунния ливчусса жула студентътал бур, Москавлив ялапар хъанахъисса кулпатирттавами къахIисавну. Ассоциациялул лагрулий ми цачIун бан захIматну бия. Пикри хьуна Ассоциациялия Жагьилтурал координационный совет бан ( миннавух «Лакия» ММОЛ-гу), хIала-гьурттуну зун, куннан куннал кумаг буллан, тарбиялул даву дачин дан ва м.ц. аьмсса масъаларттаха зун. Укунсса хIала-гьурттушиврул лагрулийри хIакьину жул делегациягу ва мероприятиялий гьуртту хъанахъисса», – бувсунни Арсен ХIусайновлул. Шиккува кIицI лаган, мероприятиялул сакиншиннарал комитетрал чялишсса членну хьунни Арсен Буйдалаевичлул душнил оьрчI, Лавайсса даражалул экономикалул школалул 2-мур курсрал студент Кьурбан Сунгъуров, вава школалул цалчинмур курсрал студент Анвар Илиясов.
Вечер сакин дурну дия лавайсса даражалий. ХIадур дурну дия Дагъусттаннал лайкь хьусса артист Рашид Багатаев гьурттусса авадансса концертрал программа. Студентътурахь Дагъусттаннал халкьуннал культуралия, багьу-бизулия бусласисса, кIулшивурттал бияла хъунмасса бушиврий чIурчIав дуллалисса ва мюнпатсса маслихIатру буллалисса ихтилатру бунни Арсен ХIусайновлул, Гульшан Хасаевал, Ххадижат ЦIаххаевал.
– Зу дуклай буру билаятрал ца яла сий думур вузраву. Му хъунмасса тIайлабацIугур, жаваблувшивугур. Шикку ларсъсса кIулшивурттугу, тарбиягу зун дучIи лякъинтIиссар гихунмайсса оьрмулуву.
Москавуллал Авиациялул институтрал преподаватель, профессор хIисаврай 60-нния лирчусса шиннардий зий, на гьарица кьини хьунаакьлай ура студентътуращал, аспирантътуращал, магистртуращал. Учин ччива, вузраву ларсъсса кIулшивуртту гихуннай зул пишалул ва ххуйсса оьрмулул цIакьсса гьануну хьунтIиссар, – увкунни Арсен ХIусайновлул кIулшивурттал бияла хъунмасса бушиву кIицI лаглай.
– Инсаннал оьрмулуву яла кьимат лараймур зат – кIулшивурттур. ХьхьичIва жула буттахъул, ттаттахъул хъус лякъин, кулпатрал маэшат гьаз бан лагайсса бивкIхьурча Дагъусттанная, хIакьину зун мукун гьан багьлай бакъар. Зу букIлай буру кIулшивурттал хъирив. Муниягу дакI ххари хъанай дур. ХIарачат бара шайссаксса мюнпатну ишла дан дуклакисса чIун, ххишаласса кIулшивуртту ласун, цинияргу, мийри зун дучIи лякъинтIисса. Дагъусттаннал цIа мудангу бюхттул дуллай бивкIссар хьхьичIунсса элмулул, магьирлугърал зузалт, творчествалул интеллигенция.
Ччива зугу мува ххуллийх най. Жул зуйн хъуннасса вихшала дуссар. ХIакьину шикку жущалва бур цIанихсса академиктал Арсен ХIусайнов, Хизри Амирханович. Вай бур Дагъусттаннал цIа лайкьну дуручлачисса инсантал. Вайннах бурувгунни Дагъусттаннангу, жунма, циняв дагъусттанлувтурангу кьимат бищунтIисса. ХIарачат бара ххуйсса кIулшивуртту ласун ва дакIний битияра, тарбия, мяърипат дакъахьурча, дуккавугу укуннасса чIалачIинни. Ччива зуяту кIулшивурттацIун, яхI-къириятгу, ас-намусгу бусса, Дагъусттаннал ттугъ бюхттулну лавсун нанисса инсантал хьуну, – увкунни Гульшан Хасаевал.
– Ххирасса студентътал, зу хъанай буру жула хъунмасса билаятрал, Аьрасатнал, граждантал. Аьрасатнал ца агьамсса бутIанугу хъанай бур караматсса Дагъусттан. Шикку гьарица чарил, кIичIираваллил, жегъир ххуллул цила тарих буссар. ЧIяву миллатру бусса Дагъусттаннай гьарица миллатрал цила маз, аьдат-эбадатру дуссар. Жура ми бусраврай ягу дурну, никирая никирайн дачин дан аьркинссар. Жула бучIантIимур ххуй чулинмай баххана банссар тIисса вихшала дуссар зуйн, хIакьинусса жагьилсса никирайн, – увкунни Ххадижат ЦIаххаевал.
Студентътуралгу дакIнийхтунусса барчаллагь увкунни цащалва хьунабакьин бувкIминнахь.
Андриана Аьбдуллаева
