Дагъусттаннал Росгвардиялул управлениялул ОМОН-далул ва МахIачкъалаллал соединениялул аьралийтал гьуртту хьунни КIул акъа СаллатIнал кьинилун хас дурсса акциялий.Мероприятие хьунни Лениннул Комсомолданул цIанийсса паркраву.
Мунил сакиншинначитал бия «Волонтеры Победы» тIисса щалагу Аьрасатнал жяматийсса суккушиннарал региондалул отделение. КIул акъа СаллатIнал аьпалунсса мажлисрай гьуртту хьун бувкIун бия ихтиярду дуруччай органнал зузалт, жагьилтурал ва жяматийсса организациярттал активистътал. Росгвардиялул МахIачкъалаллал соединениялул хIаписар, капитан Руслан Батаевлул цала ­ихтилатраву кIицI лавгунни ва Буттал кIанттул цIанийсса Хъунмасса дяъвилий совет саллатIнал ва хIаписартурал ккаккан дурсса чувшиву абад дуллалисса, Ххувшаву гъан дуллай жанну дуллуми дакIнин бичлачисса кьини хъанахъишиву.
– КIул акъа СаллатIнал кьинилул дакIнин бутлай бур цукун ххирану бавцIуссарив жунма паракьатсса оьрму. Жула буржри совет саллатIнал къучагъшиву дакIний ритан ва хъирив нанисса никирттахь буслан, – увкунни ванал.
Акциялул гьурттучитурал дирхьунни тIутIив Аьралийчунал гьайкалдануцI. Буттал кIанттул цIанийсса Хъунмасса дяъвилий жанну дуллуминнал аьпалун баян бунни минутрайсса пахъ багьаву.
Андриана Аьбдуллаева