ЧIавахьулттих гьава мукунсса бурхха, кIиришиврия ххассал хъанан багьлай бур. Шикку жунмагу, цайминнангу цаппарасса затру дакIнин бичаврия ва ми щаллу буллалаврия, дюхлул хьурча бакъа, зарал къахьунссар.
КIиришиву дусса чIумал къабучIиссар:
– Хъунмасса хIаллай кьатIув бацIлан.
– ХIачIлан кофе. Гьантлун ца чашка хIачIаврийну гьашиву дувара. Кофеиндалул инсаннал организм хъатрулуцIа дуллалиссар.
– Газ бусса нацIусса хIачIияртту хIачIлан. Вайннул, мякь лиххан къабаврицIун, чурххавусса хъатругу дуккан дуллалиссар.
– Градусру лахъсса, аьнтсса хIачIияртту (аьракьи, чяхир) хIачIлан. КIиришиву дусса чIумал вайннуя чурххан хаснура нигьачIаву дуссар.
– ЗахIматсса, гуж багьлагьисса даву дуллан, спортрахух гьан. Гьамин, хъунмасса гуж харж хъанахъисса даву дуллан.
– Синтетикалул янна лахлан. Вайннул чурх ссихI ласун къабитлатиссар, парникраву бусса кунмасса иш буллалиссар.
– МикIларчIсса щинавун цакуну буххан, бучIлан.
– МикIларчIсса щин хIачIлан. КIири лавгсса хханхха цакуну бякъаврил чурххан нигьачIаву, зарал буссар.
– КIирисса кьатIату кондиционерданул микIлачIун бувсса къатлувун цакуну буххан ягу микIлавчIсса къатлува кIиринийн кьатIув буккан.
КIиришиву дусса чIумал аьркинссар:
– Гьантлун 2 литралияр чан дакъасса щин хIачIаван. Вай цирдагу дикIан аьркинссар ссибивкIусса, къатлул температуралийсса. Щин хIачIлан аьркинссар чан-чанну ва чIяруссалийлла, мякь багьаннин, кьакьари кьакьаннин къабавцIуну.
– Кьинилул лахъишиврий хIачIлачIисса укуннасса щинацIун, минерал щинал ца-кIива стакангу хIачIаван, организмалувусса минерал цIийлгу (хлор, калий, натрий), микро ва макроэлементиртталгу баланс дуруччин.
– Вава мурадрай, хIачIлачIисса укуннасса щинавун чан-кьансса цIу бичаван (укунсса щинал гьантлун ца-кIива стакан).
– Лахлан лендалул ва паммалул (хлопчатобумажный) янна.
– Янна дикIан аьркинссар чаннасса рангирал ва чурххацIун къаларчIсса, гьартасса.
– БакIрай бикIан аьркинссар кIиришиврия мюхчан буллалисса мурцIу, тIакьа ва м.ц. БакIраймургу дикIан аьркинссар куклусса, чаннасса янналия дурсса.
– Чурххайсса гьулурду (родинкарду), ттангъри, папилломарду бургъия кIучI даван.
– Ишла дуллан бурчу къаччуччинсса (хаснува чаннасса бурчу буминнал) кремру ва цайми дугъаннурду.
Бюхъавай:
– Мабуккаванни кьатIу-шав. Зура дуллалимунил хIисав-сан мукун дулувара, кIири бувсса чIумал (ссят 11-нния 17:00 хьуннин) я шаппа, я даврий бикIансса куццуй.
– Хъуннасса чIун жяматийсса транспортраву гьан мадувари. Чара бакъашиву дакъа, архсса манзиллайсса аьрххилий мабуккаванни.
– Шайссаксса чIявуну булучIияра щинавун. Щингу дикIан аьркинссар къатлул температуралийсса.
– Канаки куклусса, хъинну аьгъу дакъасса, цIийх къадурсса ва ярк дакъасса дукра. Дукралувун ишла дуллали чIярусса ахъулсса ва ахънилсса, ккурчру (кашарду), дяркъусса накьру (окрошка).
– Дукра чIяру мадувари, чурххайн гуж къабагьан.
– Шайссаксса чанну ягу дурагу маканарди нацIушиву ва цIу. Укунсса дукралул мякь ххишалану багьан буллалиссар.
– Чяйлул журардаву язи дугьара щюллимур.
– Шайссаксса чанну ишла дуллали техника. Зузи дурсса техникалул къатлувусса гьава хъиннува кIиригу, кIугу буллалиссар.
– Лалукьира чIавахьултту, кьатIату кIиришиву ва лах-ххит бакъасса цичIар къадуххансса чIумал.
– Бурувччуну бикIира сквознякирттая.
– ЧIун-чIумуй къатлувун кьатIату марцIсса гьава буххан булувара.
– Къатлувун тIайланма баргъ багьлагьисса кIанттурду бащира.
– Гьарца кьини дулувара «хъартсса уборка», лах-ххит ливхьуну, щялу шюршуну.
– Косметикалуву ишла мадулларди кIусса, бурчул ссихI ласаву захIмат дуллалисса кремру ва цамур.
– ЧIун-чIумуй чюхлилун бугьлагьи ччанну ва кару.
ХIадур бувссар Бадрижамал Аьлиевал
