Ва гъинтнил караматсса тIабиаьт цIу лаглагисса гьантрай Ккуллал шяраваллил хIатталлий, чIявусса агьлугу бавтIун, хIурматрай ахиратрал ххуллийн тIайла увккунни СВО-лий жан дуллусса ца уттигу шагьид. Кьура шинавусса игит. КIира ниттил ца арс. Ца ниттил увсса, гамур ниттил хъуна увсса. Ккуллал шяравасса Ризваннул арс АхIмадов ХIамза.

Цалчинмур ЦIувкIратусса Верал ва Ккуллал шяравасса Рамазаннул арс КъубатIаев Аьлил ташу бувну, Заннал цанма лякьлул оьрчI нясив къабувкун, Аьлил ссил Ссапижатлул оьрчI вайннал цалашиврий ивхьуну ур.
Вера Ккуллал райондалул агьалинал цIуллушиву дуручлай оьрму гьан буллалисса инса­нни. Аьлигу райондалул азарханалул терапиялул отделениялул хъунаману зий икIайссия, жяматран хъинну бусравсса адамина уссия. ЛаснацIа шаврил къюву цурдалу къаличIан тIисса кунма, хьурдай тIий, нясивну лявкъусса арснацIагу хьунсса кьадар бивкIун бур Веран.
ХIамза увну ур 2003 шинал июньдалул 8-нний Ваччав. КIиккува лавгун ур дуклангу. Школалий ванал цува дуккавриву итххявхсса, хьхьичIун урувгсса ушиву ккаккан бувну бур. Школалул дуллалисса мероприятиярттавухгу чялишну гьур­тту шайсса ивкIун ур. АрхIал дуклакиминнащал хIал бавкьу­сса, учительтурал хIурмат бу­сса. 2019 шинал школагу къуртал бувну, дуклан увххун ур Автоххуллурдал колледжрал юридий факультетрайн. Колледжравугу ва хьхьичIунми студентътуравух ивкIун ур. Спорт ххирасса, оьвхъусса, я бацIансса ХIамза чув ухьурчагу итталун багьайминнавухсса ивкIун ур. Ватан ххирасса чIаважагьилнал, аьралий хIадуршиннарагу дакъанура, контракт чирчуну дур 2024 шинал июльданий. Гьан увну ур Луганскаллал республикалийн. КIира нюжмардийсса аьралий ишругу лахьхьин бувну, 2024 шинал август зуруй Лисичанскалийн талатавуртту къизгъиннийн лавгун ур. Августрал 6-нний бувкIун бур кьурчIисса хавар. Тания махъгу ванал нурчIи лякъиннин, Ватандалул аьрщараву дишиннин барзру лавгун бур.
– Та кьинилия шинмай жул оьрмурду цIан ттуруллул бувгьунни. Хъит бусса, зирангсса оьрчI икIайва. Дустал, мачча-гъанми ххирасса, ххари буван ччисса ия. Ванан хъатIи бан, наслу хъуни буллан хияллай бикIайссияв, ва сагъну усса чIумал, ххуйсса цамур дунияллий бусса кунмасса иш бия, ХIамзайну ххуйсса оьрму бия, дунияллул рангру яргну дия, – тIий бур нину Вера.
– Ттул аьзизсса арс, ххаллилсса бакIрал, бювхъусса чурххал заллу, патриот, мютIи ан къавхьуну, «на къагьарча, цури лагайсса» тIий, цIакь дурну контрактгу, лавгуна виричунал чувшиву дуван. ЧIивину уна къурув нувщулсса бан уккайссия, ххалав чIиникI бищун уккайссия. Шаппаллил кушурду бан махъаллил къашайссия. АцIва зуруй къаляхълай, банмур бакъа ливчIун бивкIру, щукрур Аллагьнайн, буттал аьрщарай гьав нясив дурсса, – тIий бур Ссапижатгу.
– Валлагьий, дакI хъинсса оьрчI уссия. Заллу акъасса ккаччи-ччиту бакIрайн багьуннихха, шаппай бувцуну учIайва. Шювшуну, марцI бувну, цалва къабувкуну, миннун ччатI булайва. Дустал ххира­сса, дакI цIимисса ия. ЧIивиния шинай цинявннан ххирассия, бусравссия. Инсаннал чIарав ацIан, кумаг буван, ххуймур буван хьхьичIунсса оьрчI уссия, – тIий бур ниттилссу Разият АхIмадова.
ХIамза къаляхълахъисса гьантрай ванил чивчусса шаммарду хъинну бюххансса бур.
– Жулла къумашиву чагъардай, шаммардаву аьч дуллай бивкIру жухьва жува. Веран ци бави, Ссапижатлун ва Ризва­ннун ци бави, жунма ци бави тIий бивкIру, хьхьу-чани къювулийсса буруккин бакIрава къабуклакисса. Ванал ччиту ххира буллай ливчIунну, ванал суратру хъазамравун лякIин дуллай ливчIунну, – тIий бур Разият. «Гьуя, бавай, куссияв, вав-шав, мамай, куссияв, леххаву щийн куссия, кIира бавал ххира арс?» – укун дайдирхьуну дур Разиятлул къювулийсса шаммардал чарссагу.
«Ниттихъал мукьаяр кьурчIисса цири дусса?» – укунсса ххаругу бур Разиятлул шаммардаву. Бакьлай бура нагу ваницIун.
Верахьхьун, Ссапижатлухьхьун, щалва ляхъиндалухьхьун, гъан-маччацириннахьхьун ва кьурчIишиву духIансса, лялиян дувансса ссавур Аллагьнал дулуннав! Шагьиднал рухIгу алжаннул ххари даннав!
ПатIимат Рамазанова