Дагъусттаннал ХIукуматрал председатель Аьбдулмуслим Аьбдулмуслимов гьуртту хьунни Ираннаву Каспий хьхьирил чIарахсса паччахIлугъирттал провинциярттал ва регионнал каялувчитурал хьунабакьаврий. Форум хьуссар «Каспий – мост дружбы и регионального развития» тIисса цIанилу.
Хьунабакьаврий махъру лавхъунни Ираннал властирдал органнал вакилтурал ва Аьрасатнал, Ираннал, Азирбижаннал, Къазахъисттаннал ва Туркманисттаннал регионнал каялувчитурал.
Делегациярттал бакIчитурал бувсмунийну, хъуннасса агьамшиву дусса дур машлул, шяраваллил хозяйствалул, зана-кьала даврил промышленностьрал, цачIу инвестицияртту аьркин даврил, хьхьирил туризмалул бутIраву Каспийрал чIарахсса регионнал ва провинциярттал дянив экономикалул хIала-гьурттушиву гьарта-гьарза даврил.
Къулбасру дурсса документрава чIалай бур гьурттучитурал хъин чулий ккаклай бушиву Каспий хьхьирил регионнал ва провинциярттал университетирттал ва элмулул центрдал дянив элму ахттар даврил иширттаву уртакьну зузаву. Мукунма ми рязину бур Каспийрал чIарахсса паччахIлугъирттал транспортрал инфраструктура дузал даврил ва цIу дуккан даврил хIарачатирттая.
Микку мукунма бувсун бур аьркинну бушиву щинал ва биологиялул луртанну мюнпатну ишла дуллан, хьхьирил мяъдан закондалий бакъа ишла къабуллан, мукунма хьхьири чапал буллалаврил хьхьичIалу кьукьлан, экологиялул мониторинг дуллан, биологиялул ляличIишивуртту ядуллан.
Аьбдулмуслим Аьбдулмуслимовлул тIимунийну, ва документрайсса предложениярттал ккаккан буллай бур форумрайн бувкIсса циняв гьурттучитурал аьмсса хIукму хьуну бушиву Каспий хьхьирил щала территория лядуккан дуван, коммюникелул циняв пунктру бавкьуну бушиву ттизаманнул тIалавшиннардацIун.
