Ларгсса нюжмардий А.-П. Салаватовлул цIанийсса Къумукьнал театрдануву республикалул парламентрал каялувчи Заур Аскандаровлул кабакьаврийну хьунни захIматну къашавайсса оьрчIан кумагрансса «ЛяличIисса оьрчIал исповедь» тIисса цIанилусса концерт.

Жу хьхьичIмур номерданий баян бувсса куццуй, ва даврил сиптачиталгу бия «Яхъанахъу цайминнайх хъиншиву дачIлай» тIисса фонд. Театрданул фойелуву цIуллушиврул нукьсансса оьрчIал дурсса суратирттал выставка дия, бавтIциригу ва выставка ххал дуллай бия.

Концерт дайдишин хьхьичI, Заур Аскандаровлул бувсуна Хакьуннал Мажлисрал бартдигьлагьисса «Хъиншиврул десант» тIисса проектрая. Ванал кIицI лавгуна, республикалий оьрчIал цIуллушиву цIакь даврил ххуллий дуллалисса давурттая, миннувух реабилитациялул давриягу. Бувсуна ларгсса шинал 200 оьрчI Москавливсса «ОьрчIшиву» тIисса Реабилитациялул центрданийн тIайла бувкшиву, гьашинугу микссава тIайла бувкшиву ва шинал ахирданийннин 400 оьрчI тIайла буккансса ният душиву. Бувсуна парламентрал спикернал, медициналул элмурдал доктортал, академиктал Александр Румянцев ва Андрей Каприн гьурттусса, онкологиялул къашавайми хъин буллалисса даву ларай дуваву мурадрайсса 3 хъунисса конференция дуршиву, микку агьамсса масъалартту гьаз бувшиву. Ккаккан дурна кIицI лавгсса фондрал дуллалисса давриясса документал журалул киносуратгу. Фонд хIасул бувсса Лайла Каримовал кIицI лавгуна, шиная шинайн фондрал лагма лаглагими чIяву хъанай бушиву, мюхтажсса оьрчIан кумаг бувансса шартIругу гьарта-гьарза хъанай душиву.

Халкьуннал Мажлисрал хъунаманал хъиривчу Камил Давдиевлул кIицI лавгуна, республикалий медициналул бикIу, цамур журалул бикIу кумаг аьркинсса оьрчIру чансса бакъашиву, «Яхъанахъу, цайминнайх хъиншивуртту дачIлай» тIисса фондгу хъуннасса даву дуллай бушиву, личIи-личIисса идарарттал вакилтал бавтIсса мероприятирттаягу къашавайсса оьрчIру хъуни буллалисса кулпатирттан хайр бушиву. Авадансса ва яргсса дия концертрал программа.
Дагъусттаннал машгьурсса артистътуращал сахIналийн буклай бия П. Чайковскийл цIанийсса ОьрчIал магьирлугърал 1-мур школалул «Сюрприз» театрданул студиялул чIава артистъталгу. Балайрду увкуна Тельман Ибрагьимовлул, Кристина Рамазановал ва Аьйшат Айсаевал, Аьдил Уцумиевлул, Даниэл Гьаруновлул ва цайминнал. «Мудангу ихIсандалул мероприятиярттайн ттуйрасса жаваблувшинна кIулну хIадур хъанан бикIара, гьуртту хъанангу мудан гъира бикIай, ва ппурттуву личIиссава асардащал бувкIра, мероприятиялул цIанила буслай бурхха, цукунсса бюххансса асарду гьузиххин буллалиссарив дакIурдиву. Хъунмасса барчаллагьрай бура ва давугу дурсса, къашавайсса оьрчIан ва миннал кулпатирттан азардал балаллава буккан кумаграл ка тIитIлатIисса фондрангу, хъинну ххуйну хIадур хьусса оьрчIан цанмагу. Мяйжаннугу, караматсса гьунарду ккаккан бунни вайннал сахIналий. Нагу мудан хIадурну буссара укунсса оьрчIал чIарав бацIан», – увкунни концертрай гьуртту хьусса Да­гъусттаннал лайкь хьусса артистка Нурианна Къаллаевал. Залданувун бавтIцири ца зумату кунма, ляличIисса оьрчIал дакIурдил мукIрушиндарал бюххансса асарду биян бувшиву кIицI лаглай бия. Цамур куццуй бикIангу къабюхъайссия. Къашавайсса оьрчIал дакIурдил угьру, къювулийсса цIуру-кIуру, вихшалдарал бувцIусса яру ва дакIурдил хъиншиву асар къахъанан, жуллами дакIругу чарил дакъархха. Вай оьрчIал чаннасса симаннал чани чIявуссаннал дакIурдивун бияннав, оьрчIру цивппагу, нитти-буттащал, ичIувацириннащал азардаяргу ххув хьуну чаннайн букканнав!
ПатIимат Рамазанова