Мадара хIал хьуна МахIачкъала шагьрулул дянийх нанисса тIиртIусса каналданувун машина багьавриясса бусавуртту дуллай. Гьай-гьай, каналданувун багьсса машиналувусса инсантал ххассал бувминнан хъунмасса барчаллагьри. Амма ттул зухь бусанмурдив цамур бур.
На, гидромелиораторнал касмугу лархьхьуну, му даврий зий 25 шин дурссар. Га канал цила чIумал, яний 1923-ку шинал, каних дурккун диркIссар 70 километралул манзилданий. Га дуккаврихлу га чIумал Дагъусттаннан дуллуну диркIссар Октябрь Революциялул орденгу. Каналданул щин ишла дуллай бивкIссар, уттигу буссар, хъуруннайн дишингу, хIачIангу. Яла, 1970-ку шиннардия махъ, га шагьрулувух нанисса каналданул чIангу, чуллугу бетондалул бавкьуссар. Канал марцI дуваншиврулгу, ганил кIивагу чулухухсса зумардаяту цичIар дахчаву дакъасса, 15 метра утташиврул дикIан аьркинссар. Га марцI дувайсса «Драглайн» тIисса экскаваторданул стрелалулгу муксса лагрулул габарит дуссар.
Амма му тIалавшин дурагу дурурччуну дакъар. Бувну бур чIарахва машиналул ххуллурду, дурну дур къатри. Цур вай цила чIумал къабурувччусса иширттал жаваб дулун аьркинма?
На бувккуссия ца журналданий: «МахIачкъалаллал чIарах нанисса муххал ххуллу буллалийни зунттурдал лултту буван ккаккан бувну бивкIссар тIий, яла, ххал буварча, хьхьирил чIарахсса балугъру бугьай батагъарттал хьхьирицIух буван бувссар тIий. Вана укун, хIакьину яхьуну, гьунттиймур цукун-бунугу хьунссарча тIисса чIумал, жува архну лавгун ­къалякъайссару. ­Ца-ца чIумал къуллугъчитурал ва хIукмучитурал чIаравгу жулвамур пикри сивсуну бусан махъал къахьунгу аьркинссар. Нагу, муххал ххуллуягу, КОР каналданиягу архну зунттаву яхъанахъисса зунттал чув, зу хатIа-апатIирттаяту бурувччуну битаннав тIий, Аллагьнайн лаизлай ура.

ХIажимурад ХIусайнов,
ш. Вихьул