Къяннал шяравасса Оьмарил арс Имранов Камил увну сентябрьданул 9-нний хьунтIиссия 100 шин.
Дагъусттаннал лайкь хьусса учитель, просвещениялул отличник, Къяннал жяматрал лайкьсса арс Камил увну ур 1925-кусса шинал Къянив чIявусса оьрчIру бусса Оьмарил ва Сакинатлул къушлий.
Лаккуй 7 класс бувккуну махъ, 1939-кусса шинал Камил буттащал архIал лавгун ур Киеврайн. Тикку шинал мутталий къалайчишиврул касму лахьлай ивкIун ур. Киеврай та чIумал яхъанай бивкIссар ванал ссугу, ссил ласгу. Муния мукьах 15 шинавусса чIаважагьил лавгун ур Архангельскалийн, цала хъунама уссичIан. Тикку ванал школа къуртал бувсса ппурттуву хар-хавар бакъа байбивхьуну бур Буттал кIанттул цIанийсса Хъун дяъви. Хъуними уссурвал лавгун бур аьрайн. Цукун-унугу цува бакIукканшиврул, Камил зун ивкIун ур къалайчину.
1942-кусса шинал февраль зуруй, оьвкуну тиккувасса военкоматрайн, буллуну ца буханка ччатIулгу, ца ттархь микIларчIсса колбасалулгу, тIайла увккун ур Дагъусттаннайн. Зувиллий шанма гьантта хьуну бур ванал ххуллийх най ссай-ссай унугу, хъунмурчIин – хъуслил поездрай. Ххуллийх мунан цимилвагу пикри багьну бивкIун бур дяъвилийн гьанна тIисса. Амма ванайн бувну бивкIун бур приказ цала ватандалийсса военкоматрайн учIан аьркинссара тIисса. Военкоматрайнгу ивну, микку учетрай авцIуну мукьах Камил зун увххун ур «Дагдизель» заводрал 11-мур цехравун. Амма, цалла дуккаву гихуннайгу нани даву мурадрай, мура шинал сентябрь зуруй Камил увххун ур Гъумучиял педучилищалувун. Оьрус маз ххуйну кIулсса ушиврийн бувну, найунува кьамул увну ур училищалул 2-мур курсирайн. Ноябрь зуруй захIматчитурая сакин бувсса Къяннал ва Хъювхъиял батальондалувух гьуртту хьуну ур къанавртту дуклакисса захIматрал фронтрайгу.
1944-кусса шинал, ххаллилну педучилище къуртал бувну мукьах, цала пишалий зун тIайла увккун ур ЦIуссалакрал райондалийсса Чапаево шяравун. Амма, хъунма хIал къалавгун, Камил кIункIу хьуну ур Лаккуйсса цалла буттал шяравун, зун ивкIун ур кIикку учительну.
Муния махъ, дурккумуний гьашиву къадурну, увххун Пединститутравун, бувккуну бур химиялул ва биологиялул факультет. Му къуртал байхтугу, тIайла увккун ур Гъумукун. КIикку школалий дарсру дихьлахьиссаксса хIаллай бувну бур ванан мурадрансса кIива душгу.
Амма ванан ялагу кIурааен багьну бур буттал шяравун, кIикку цала бугьарасса нину-ппу буну тIий.
ХIасил, аьмну педагогнал пишалун Камиллул харж дурну дур цала оьрмулул 59 шин. ЦацIунма бавкьусса бювхъусса кулпатращал, Ххадижатлущал, архIал Камил нахIуну, хIалимну яхьуну ур 65 шинай, ххаллилну хъуни бувну бур ххюва оьрчI.
Цува зий, захIмат буллай ивкIсса гьарцагу кIанттай Оьмардул арс Имранов Камиллул кьадиртун дур кьадрулий ва кьиматрайсса цалла цIа. Яхьуну личIантIиссар ванал уздансса аьпагу лахъисса ирсирай.
Жул корреспондент
