Вай гьантрай зунттаву агьали лазуни духларгун ливчIшиву буслай, фермертал леххаврил чIурду баян аьркиннайн, дакI цIуцIиминнайн баян буван хIарачат буллалисса ппурттуву, бувккунни официал источникирттай ва социал сетирдай: «Ай, диялсса луртан лазундарал къадуллай бур, дукIурагу диял къархьуну дунура дарсну къархьунни, хIатта курчIил хьуну бур» тIисса хаварду.
Ттул, хаснува официал источникирттай, укунсса комментарияртту ккалай, дакI зия хъанай дия. Цалчин, курчIилсса инсантураща зунттаву яхьун къашайссар. КIайксса хъунисса марххалтту бувсса чIалай бунува, ккашил къиялул ризкьи литIлай чIалай бунува, инсантурал къюву лагь дуванмур бусаяр, хъанай бухьурча кумаг буваяр, кумаг бан къаччай бухьурчагу чIарах лагаяр, «лазуни заллухъруннал ишри» тIий, экспертшиву дуллан ссан аьркинссар? Кьини дурксса чIун – экспертшиву дай чIун дакъар.
Цал инсантал балаллува буккан битан аьркинссар, ччурччу дикIуйн цIу къабичлай. Бувсса кумаггу лахъуни хIалану бувну щин ччиссар? Бигьашивуртту дусса шагьрурдайгу къутI бивкIун, зунттавуминнан лахьхьин булланнин, цал пикри бувара: инсантал ххалайн буккан битайсса гъи дияв, хIаллил чIумал гъарагъисса-гъарай, бувцусса ххулув кьакьан къабитлай, буххин къабитлай, азурда бувна инсантал. Бувцуми сайки аьллалисса кIанттугума бия.
На зунттавура бувсса, хъунма хьусса. Лув-ялув нюжмардий марххалтту буллалисса чIумал, дурми луртаннугу дарссуну лагайссар. Мукунни хьусса ва ххуллухьгу.
Чиннияр цанмар цала ризкьи ххирасса ризкьичитурангу. Яттийх, гъаттарайх, дучрайх дурксса кьини чIалай, марххалттал бакIавун бахьлаглай бунува, гьаксса яхI буллай бия инсантал. Ттун кIулли, мотоциклетирттай ххалал ккипру ххилай жагьилтурал хьхьурду уттара дуршиву. Бунал бакъанан ххулувгу буллай, кумагругу буллай балаллувагу буккантIиссару.
Зунттурдува ччех бикIлакIисса ва захIмат-жапасса ппурттуву зунттаву яхъанай, зий, захIмат буллай, буттал кIану ябуллалиминнан ссавургу, хъинмургу чIа тIий бура.
ПатIимат Рамазанова
