МахIачкъалалив хьунни Дагъусттаннал Гуманитар институтрал Национал политикалул ва диндалул иширттал министерствалущал уртакьну хIадур бувсса жагьилтурал форум «Российская молодёжь в системе патриотического и духовно-нравственного воспитания: современный взгляд».
Ва хас бувну бия Дагъусттаннай баян бувсса КIулшиву дулаврил шинан. Аьрасатнал ва Дагъусттаннал гимнру учаврийну дайдихьу дувайхту, ДГИ-рал ректор НухIкьади БахIмудкьадиевлул бувсуна форум ци мурадрай буллалиссарив. «ХIакьину жяматрал хьхьичIун лавсъми гьануми масъаларттавух бур жагьилтал ватан ххирану, рувхIанийсса ирс-ххазина хьхьичIунну, мяърипат дуну тарбия буваврил масъалартту, мукунма эксремистътурал ва цаймигу заралсса идеологиялия махъаллил буваву, бяйкьу ххуллийн багьан къабитаву. Ва форумгу му ххуллийсса давур», – увкуна ванал.
Тиккура дурккуна Миллатирттал иширтталсса буллалсса федерал агентствалул каялувчи Игорь Бариновлуятусса телеграмма. Ванал телеграммалий кIицI лавгун бия Украиннавусса спецоперация нанисса ва цIанасса ппурттуву Дагъусттаннал жагьилтурал илданун ккаккан дурсса чувшиву щалвагу Аьрасатнаву ккаккиялунсса чувшиврул дарсру хьушиву, Дагъусттаннал жагьилтурал ватандалухсса хIакьсса ччаврил яргсса мисаллу бушиву. Дагъусттаннал муфтинал кумагчи, исламрал элмурдал доктор МухIаммад МахIаммадовлул бувсуна жагьилтуран рувхIанийсса ххуйшивуртту хьхьичIунсса тарбия дулаву мурадрай, Муфтиятрал дуллалисса давурттая. Вара тема аьч дурна национал политикалул ва диндалул иширттал министр Энрик Муслимовлулгу.
«Аьрасат тачIав щийнчIав ххявхсса билаят бакъассар, тарихравун куртI хьурча, бакъашиву мяйжан буллалисса хIуччарду буссар гьанулун ласунсса. Ялунгума Аьрасат мудангу цалассагу, чилссагу граждантал буруччинни гьаз шайсса. Украиннавугу мукунни агьали буруччин багьсса. Дагъусттаннал жагьилтурал 1999-ку шинал, аьратталсса ппурттуву ккаккан бувссар кьини дуркний ца хьуну душманнайн данди буккайсса вирттал бушиву. Ватандалухсса ччаву куртIгу, цIакьгу дуллалисса тарбияр диркIсса ва дикIантIиссагу», –увкунни Муслимовлул.
Мюнпатсса ихтилатру бувна республикалул жагьилтурал иширтталсса буллалисса министр Камил Саидовлул, Москавуллал ХIукуматрал Жагьилтурал комиссиялул комитетрал каялувчи Камил Габдулиннул, МахIачкъалаллал епархиялул секретарь Иеромонах Силуаннул. Дагъусттаннал гуманитар институтрал кафедралул хъунмур, философиялул элмурдал доктор Асият Буттаевал аьщуй-ххуттай бавцIуну жагьилтурал тарбиялул ва кIулшивурттал масъалартту ва чаранну ххал бигьлагьисса доклад бувна.