КIинтнин мархьгу, хьхьуригу цила кIунттища итадакьин цуксса къаччайнугу, дуркIунни инт – аьрщарай захIмат буллалиминнал ка цIаравусса чIун. Хъуннасса бакIлахъия дучIан давриву къачIивисса кIану бугьлагьисса гьанна ххяххан буллалаврияр хIакьинусса жулва ихтилатгу.

* * *
Рассадалунсса гьанна ххяххан буван ишла дуван аьркинссар марцIсса буллугъсса аьрщи. Ванил дезинфекциягу дурну хъинссар: шивусса заралсса затирттацIа хьуншиврул 70-90 градус кIиришиврул дусса духовкалуву 20-30 минутIрайсса дирхьуну ягу марганец ишла бувну (щинал 10 литралуву марганцовкалул 1 грамм дяххан дурну дутIин рассадалунсса гьанна бугьан нанисса аьрщарайн).

* * *
Мукунна рассадалунсса гьанна бугьан нанисса тIахIунттулгу, ишла дувантIисса цамунилгу дезинфекция дурну хъинссар.

* * *
Рассадалунсса гьаннагу, вай бугьансса аьрщигу хъирив лавну язи дугьан аьркинссар.

* * *
Ялув бацIан аьркинссар гьарца гьанна цила чIумал бугьаврилгу.

* * *
Мукунма ялув бацIан аьркинссар рассада цила чIумал ахъувун, дачалийн «дизан даврил». ЧIалну дурссаксса оьккину ххяхлан дикIайссар.

* * *
Гьанна, бугьланнин, хъартсса аццуву бивтун хъинссар, укун, кIурхру дурккун, чIалантIиссар бачIвами ва къабачIвами.

* * *
Рассадалунсса гьанна аьбаян бичин ишла дурну хъинссар ссавун-дунугу ларсун нюжмарду, гьантри хьусса щин.

* * *
Бугьансса гьанна хIадур ­баврил кьяйдарду чIярур. Яла бигьамур ва машгьурмур – марганцовкалул щинавун бичаймур кьяйда.

* * *
Бугьан нанисса гьанна хьхьувайния кIюрххилнин гъилисса щинаву бивтун, хъиривмур кьини бугьланнин, хъавтсса ягу кьавкьсса гьанна битияра 2-3 ссятрай дахьрасса ранг дурсса марганцовкалул щинаву. Бивгьуну, марцIсса щинаву шювшуну, кьаркьсса аццуй битияра 10 минутIрайсса. Муния махъ бучIиссар бугьан.

* * *
Рассадалун къаххирассар чIаракIлу (сквозняк). Мунияту рассада дургьусса тIахIни дирхьусса чIавахьулттий, балкондалий ххярацлурду дикIан къааьркинссар.

* * *
Рассада ххяхлахисса аьрщи бюхъавай мудан хъартун дикIан аьркинссар, амма къаатилну. Аьрщи дахьрасса хъатан дувангу щин чан-чанну дутIлан ччя-ччяни ишла дулувара пульверизатор.

* * *
Хъуннасса агьамшиву дуссар рассада ххяххан дуллалийни бакIрайра аьрщи хъинну хъатан къадаврил, ххяхлан диркIун махърив хъатру чан хьун къадитаврил.

* * *
Дахьра ххяхлан диркIсса, кIюласса ва заэвсса рассадалун зарал къахьун, пипеткалух щин дутIаван бучIиссар.

* * *
Рассада ххяхлан диркIун махъ вай нюжмардий кIийлла щинал дуччин дуван аьркинссар. Хъиннува хъинссар рассада ххяхлахисса стаканнал лув дирхьумунивун дуртIуну щин, мархрал цанна аьркинссаксса хъатру цIупI даншиврул.

* * *
Рассадалийн дутIлатIисса щин дикIан аьркинссар ххуйсса даражалул: нюжмардай, гьантрай дурцIуну диркIсса ва гъилисса (сайки 20 градусрал).

* * *
Рассада хьун дан гьанна бугьлагьисса тIахIни дикIан аьркинссар чани къаитабакьлакьисса ва ххишаласса хъатру дуккансса ккутIру (дренаж) дусса.

* * *
КIурхру лирчуну махъ тIахIни, бюхъавай, гьарца кьини 180 градусрай зана ритлан аьркинссар, чани цава-цану гьарца кIанайн билланшиврул, бургъичIан кIункIу тIий, рассада даркку-шарккуну хьуну къадачиншиврул.

* * *
Рассада оьргъашиврул шамийлла дуччин дурну хъинссар: кIурхру дурккун махъ, цамур тIахIнилуву дургьуну 2 нюжмар хьуну махъ ва тIахIнилува аьрщараву (ахъуву, дачалий) дугьан хьхьичI.

Бувсса захIматран лархьхьусса бакIлахъия хьуннав. Дургьумур ттихIинсса, ттирхIумур дукансса каши-кьудрат дулуннав Хъунасса Заннал.