МахIачкъала шагьрулул
Администрациялул бакIчинал амрулийн бувну ва ПаччахIлугърал Советрал ХIук­­мулущал бавкьуну, августрал 910нний сакин бувссар 700нная ливчусса боецтал бусса интербригада. Му интербригадалува 350 боец усса кьюкьа ларгссия Бущихъун кIанттул агьалинангу, миккусса милицанангу, аьдад чансса аьралуннангу кумагран.
Августрал 16нний интербригадалул боецтал, цайвасса буржгу биттур бувну, махъунмай кIура бавунни. Миннащалсса хьунабакьаву хьунни Ма­хIачкъалаллал Администрациялул къатраву августрал 17нний. Микку бия, С.Ж. Амиров бакIчисса администрациялул зузалт бакъасса, жяматийсса организациярттал вакилтал, журналистал.
Отрядрал командир Ш. Аслановлул аьралий зумуну шагьрулул Администрациялул Оперативный штабрал начальникнахь С.Ж. Амировлухь доклад бувунни цалла дурсса даврия.
Августрал 11нний хьхьудяризал интербригадалул боецтал бивну бур Бущихъун. Агьалинал ми ххарину кьамул бувну бур. Цийнура цурда хьусса митинграй вайннахь чIявусса барчаллагьрал махъру увкуну бур, бувсун бур дяъви най бушиву Бущихъа кIира километралул манзилданийсса Миарсо шяраву, тиккун мугьлат бакъа кумаг аьркинну бушиву. Цивппа бувкI­шиву баян бувну бур Оперативный штабрал начальник генералмайор С.Н. Оленченкон, командующий генераллейтенант Булгаковлуйн ва райондалул хъуниминнайн. Командованиялул миннайн тапшур бувну бур, ЯтIул ламуя тIайла хьуну, Годобериллал къума ратIув бияннинсса 10 километралул манзил бусса ххуллу буруччин. Микку, 9 пост дузал бувну, цала участок дуручлай бивкIун бур, шамилла душмантуращал битуххиту хьуну дур, гьарца кьини снайпертураягу нигьачIаву диркIун дур. Му бакъассагу, ярагъ бакъами гьуртту хьуну бур Бущихъ патрулированиялуву. Миарсо шяравунсса дуламалуву кумаг буллай бивкIун бур милицанан, щак бутлатисса инсантал бацIан буллай, ми Бущихъиял РОВДлийн ва ФСБлийн биян буллай.
Командиртурал усттаршиврул ва боецтурал низамрал каши дуллуну дур сагъсаламатну махъунмай кIура баен, аьркинссаксса аьрал та зоналийн бувкIун махъ.
Командирнал докладрахгу ви­чIи дирхьуну, жавабрансса махъ бувсунни С.Ж. Амировлул. Ванал барчаллагь увкунни интербригадалул боецтурахь, кумаграх мюхтажминнал чIарав виртталну бавцIуну, цаярва мюрщиминнангу эбратну хьунутIий.
 Зу жулва Дагъусттаннал цIа бюхттул дурссар, жулва миллатирттал дянивсса дусшиву цIакь дур­ссар,  увкунни Сяид Жаппаровичлул – Дагъусттан бивкIссар ва да­ин бикIантIиссар Аьрасатнал Федерациялуву, щищакIуй къа­хьун­тIиссар цалва бияла жуйва гужрай бухIан. Вари жулва кьянкьасса позиция.
Хъирив ихтилат бувунни интербригадалул роталул командир, МахIачкъалаллал Кировский райондалул администратор Артур Исрапиловлул, бригадалул боецтал: Ширинбек ХIажимура­дов­лул, АьбдулхIанапи Абуевлул, шагьрулул Ветерантурал советрал председатель Ибрагьин Далгатовлул, республикалул Ветерантурал советрал председатель генерал С.М. Халиловлул. Бущихъа­тусса Сакинат ГьитIиновал барчаллагь увкунни Сяид Амировлухьгу, бригадалул боецтурахьгу, захIмат­сса чIу­мал цалва чIарав бавцIусса, зунттаву талатиминнангу, кIия лихъан багьсса хъамиоьрчIу­ннангу кумаг бувсса. Ванил барчаллагь увкунни оьруснал саллатIнал ниттихъахь, жулва милицалтрал ва интербригадалул боецтурал ниттихъахь, нигьал ва хьуллил дянив цалва арсваврах ялугьлагьисса. Бущихъиял райондалул администрациялул хъунаманал заместитель Ш. Керимовлулгу барчаллагьрал махъ увкунни. Жагьил­сса художница Аня Самарская бувкIун бия интербригадалун пишкаш дан цилла дирхьусса сурат ларсун. Муний бур зунттал ухнилу биллалисса девтал кунмасса барцI ва барцI бутай ккаччи ккаккан бувну. Бух хьусса бурцIий ххяпригу дирзун, циява цуппа рязину буруглай бур ккаччи. Цилла суратрая буслай, А. Самарскаял увкунни: «Щак бакъар, гьарца бур­цIин цинмасса барцI бутай ккаччи (волкодав) бакIрайн багьаншиврийн»,  увкуну.
Р. Эльдарова,
№34 «Илчи», 1999 ш.