Августрал 15-нний Ингушнаву тIиртIунни Дагъусттаннал летчик Валентин Эмировлун гьайкал. Микку гьуртту хьунни Дагъусттаннал бакIчи Сергей Меликов.

Гьайкал дацIан дунни Топливно-энергетический колледжрал хIаятраву, Нижние Ачалуки тIисса шяраву.
Майрай Ингушнал бакIчи МахIмуд-Аьли Калиматовлул Сергей Меликовлуйн оьвкуну бивкIссар бусалардавун агьсса летчикнан мемориал тIитIаврийн. Валентин Эмировлул цалва махъва-махъсса гьунар ккаккан бувну бивкIссар Ингушнал аьрщарай 1942 шинал сентябрьданий.
Дагъусттаннал делегациялувух бия ДР-лул БакIчинал ва ХIукуматрал Администрациялул вакилтал, ДР-лул Халкьуннал Мажлисрал депутатътал, Республикалул ХIукуматрал члентал, «Время героев» федерал программалул гьурттучитал.
Сергей Меликовлул барчаллагь увкунни Ингушнал бакIчинахь ва агьалинахь дагъусттанлув Валентин Эмировлул аьпа буруччаврихлу.