Нисварти кунма, кьянкьану бикIаншиврул

Къатлуву нисварти яшайссар 3 гьантлий, холодильникраву – 20 гьантлий.

Нисвартуву дуссар щин, качар, клетчатка, витаминну А, В1, В2, В6,С, каротин ва цаймигу микроэлементру.
Халкьуннал медициналуву цIу­сса нисварти ишла байссар лякьлул, ттиликIрал, ччаруллал къашайшивурттан.
ЛичIлулну бикIан аьркинссар:
— ЦIил бувсса (соленые) нисварти къабучIиссар колит думиннан, ттиликIрал къашайминнан, атеросклероз, гипертония думиннан. Нисварти кьянкьасса бикIан аьркинссар, цила нисвартул кьанкьгу дусса. Агарда гайннуя личIисса кьанкь духьурча, гайннувун хъуни бансса дарув бивчуссар. Агарда нисварти ччяни зия хьурча, гайннун оьргъашия гьарза хьуссар. Укунсса нисварти цIил бангу къашайссар, гай гава цIана гъурт хьунтIиссар.

Хъин бувансса рецептру

КIиришиву думиннан:
— КIиришиву лагь шайссар нисвартул сокрал ца стакан хIачIарча.

Кьавс хьунан:
— Нисварти битайссар цIил щинаву (ца зуруй цичIар специягу ишла къадурну). Гьантлун мукьва стакан вай нисварти бивхьуну бивкIсса цIил щинал хIачIларча хъинссар.

Хъугьу тIутIинан:
-100 мл. нисвартул сокравух хIала дувара 2 хъунна къуса лаччул ва ницIал (1:1), ца ссятрайсса дитияра. Гьантлун кIийлла-шамийлла ца-кIира хъунна къуса дукра дукан 30 минутIрал хьхьичI хIачIларча, хъинссар.
-Нисвартул сокрал кIи-кIира хъунна къуса ницIащал архIал хIачIларча хъинссар.

Аьраттал увкни:
— Нисвартул ккирттал ялун дур­тIуну дяркъусса щин, дитай­ссар 2 ссятрай. Яла гай щинай лажин-кару ссюрхъирачIан бияннин шюшай­ссар. Лишин къабучIиссар.

— Парадонтоз (синттава оь наниминнан) кьацI вилаглан аьркинссар нисвартул сокрай.

КъюкIлил къашайминнан:
— Нисвартул ва салатрал (чIапIал) сокру хIала дурну кIюрххил дачIра ххюттуйн ца-ца стакан хIачIларча хъинссар.

ТтиликIрал къашайминнан:
— ЦIуну дурсса нисвартул сокрал бачIи-бачIи стакан кIюрххил дачIра ххюттуйн хIачIларча хъин­ссар. ЦIуллуну битаннав.
Кьянкьану ва щюлли-виринува личIаннав, нисварти кунма!

---

НисвартуцIунсса ялагу маслихIатру

[dropcap]А[/dropcap]хъуву чIявусса зиянчитал бухьурча, цал ишла байсса алюминдарал кIичIулуву бувхъун бишияра нисварти. Нисвартул алюминдаращалсса реакциялия хIасул хьусса кьункьал, му инсаннан кIул къахьурчагу, ахънил зиянчитал литIун байссар.

— Лажиндарайсса (мукунна чурххайссагу) жигдатIрурду лагайссар, агарда ца-кIира нисвартул ккюрнутIай жигдатIрурдайх дуккарча.

— Ца-цавайннал хIан хIарчIун махъ бакI цIун бикIай. Цалчин – чIяру мадару, кIилчин – бувкуну нисвартигу, насияра уттубишин. Гьунттий чантI учинтIиссару ххуйну, бакIгу къацIий.

— Уттубишин хьхьичI нагьар дувара ца нисварти бувкуну.

— Нисвартул ца-кIира личIу уссайх дуккарча, зул ботинкарду цIу хьуну чIалантIиссар, му бакъассагу, нисварти бувксса уссу­вух щингу къадуххайссар.

— ЗертIа тIий, чIукIа буллалисса нузкьунттуйх нисварти буккарча, зертIлул чIу бакъа шайссар.

— Экзамендалул хьхьичI гьалак уклакинан хъинссар, нисварти бувхъун, ялун щаращи­сса щингу дуртIуну, гайннуя ссихI вив ласларча, ччяни паракьат хьунтIиссару.

— Нисвартул касак ккухI­ларча, 30 секIундрал мутталий кьацIливасса ххуй дакъасса кьанкь лагайссар.

— Кран, газрал плита ххуйну марцI шайссар, аьркинсса кIанттурдайх цимилагу нисвартул касак буккарча.

— Нисвартул ккирттарах лиххан бан шайссар къааьркин­сса махъ ягу буква. Мунил кумаг­райну леххан дан шайссар фломастерданул чичрурдугума.