ТалихI бусса оьрчIрур талихI бусса инсанталну хъуни шайсса

Цири оьрчIан аьркинсса талихI бусса, цайра цалла дакI дарцIусса инсанталну хъуни хьуншиврул? ТалихI бусса оьрчIшиврун къатта бувцIусса игрушкартту ва цаннияр-ца ххуйсса яннарду къагьассар. ОьрчIан яла аьркинмур – му багьлух ласун къашайсса, жура миннащал гьан дурсса чIунни, миннахасса къайгъур. ОьрчIан мудангу асар хъанан аьркинссар нину-ппу чIарав бушиву. Оьрмулул хъуниминнаннив ччяни хъамадитай оьрчIшиву, га чIумал цивппа ссах мюхтажну бивкIссарив, цанна ссал агьамшиву диркIссарив, ссайн къаччан бикIлай бивкIссарив.

* * *
ДакIнийн дутияра зулламур оьрчIшиву: яла талихI буми чIунну, муттарду цуми бивкI­ссарив, зулва чIарав ца бивкIссарив, зува ссая ххарину бивкIссарув.

* * *
ОьрчIру, оьрмулул 5 шинаву бикIу, 15 шинаву бикIу, мудангу мюхтажну буссар нитти-буттал, оьрмулул хъуниминнал ттюнгъашиврух, вайннан мудангу кIулну бикIан аьркинссар нитти-буттан цивппа ххирану бушиву. Шай­ссаксса чIявуну хъямала багьлагьияра оьрчIайн, ми ххира буллалияра.

* * *
ЧIумуя-чIумуйн буруглаги дунияллух оьрчIал ярунних. Мунал тIутIимуних, мунал дуллалимуних буниялану буруглаги. Зула оьрчI аьтIийни, паракьат улувара, хъяхъийни, мунащал архIал хъяхъияра.

* * *
ОьрчIая вундеркинд, чемпион, цимурцаннуву хьхьичIунма, цалчинма мауллардича, хьхьичIа-хьхьичI инсансса инсан уллали, лагма-ялттунацIунгу авкьусса, оьрмулувугу цала дакIниймур иширайну щаллу буван бю­хъай­сса.

* * *
Зу зулва оьрчIал хьхьичI мунансса эбратну бикIан аьркин­ссару. Зулва оьрчIру зунма цукун къуццу тIий ччай бурив, мукун­сса бикIан аьркинссар зул багьу-бизугу, тIул-тIабиаьтгу.

* * *
Хьусса гъалатIрахлу, аьйкьаврихлу, аьркиннийгу-къа­аьркиннийгу оьрчIахун дяъви мабулларди. ОьрчIан бувчIин буллалира тахсир къашайсса, гъалатI къаитххяххайсса цучIав къаикIайшиву – я зува, оьрмулул хъуними, я оьрчIру.

* * *
ОьрчIан кIулну бикIан аьркинссар бучIимур ва къабу­чIимур, рирщуну дикIан аьркинссар къадагъамунил дазу. Хъуниминнал ва даву къадуварча, оьрчI гъалатIирттайну цува ачинтIиссар вай дазурду ххал дуллай. Мунияту хъуниминнахьсса биялар оьрчIру цанма ххирану бацIантIисса гъалатIирттая махъаллил баву

* * *
Цахлура цалла жаваб дуллан лахьхьиншиврул, оьрчIан цал лахьхьин аьркинссар цайнува цалва хIукмурду кьамул буллан, бити жулва, хъуниминнал, ярунних мюрш-кьюршну чIалачIисса иширттаву бунугу, гихунмайрив – бунияласса, хъунисса ишир­ттавугу.

* * *
ОьрчIан танмихI баву ишла дуллалира бувансса цамур ба­къани. Тарбиялуву гуж хIаламур кьяйдалул ххуйшивугу, хIасилгу му чанну ишла давривур дусса.

* * *
ОьрчIан къабучIимурнияр бучIимур чIярусса дикIан аьркинссар. Мунияту зуннасса дигьалагруну оьрчIахь аьркиннийгу-къааьркиннийгу «къа» матIри.

* * *
ОьрчI тачIав ва щихачIав лащан маулларди, я чIаххуврал оьрчIаха, я ца классраву дук­лакисса оьрчIаха, пулан вияр ххуйну дуклай ур, вияр ххуйну кумаг буллай ур тIий. Ванийну зу зула оьрчIаву цалва яруннил хьхьичIсса цалва кьимат, бусрав ялавай буллалиссару.

* * *
ДакIний битияра: талихI бу­сса оьрчIрур талихI бусса инсанталну хъуни шайсса.