[dropcap]М[/dropcap]ариян Илиясовал цIанийсса «Дараччи» фондрал Украиннай хасъсса аьралий иширттаву талатиминнан тIайла дурккунни дуки-хIачIия, даруртту, аьркинмур. Ва фондрал чирилун­сса ирглийсса давур. Укунсса давуртту «Дараччилул» сияхIрай чансса дакъассар. Фондрал хъунмур, Дагъусттаннал культуралул министерствалул Жяматийсса советрал ва МахIачкъалаллал Жяматийсса палаталул член Гульшан Хасаевал тIийкун, фондрал даврил ца къярттану хъанахъиссар рахIму-цIимилул, ихIсандалул ка-кумаг.

– ХIакьину, жулва жагьилтал жулва цIаний талатисса ппур­ттуву, жуща паракьатну тийнмайну бацIан хъанай ба­къая. Буттал кIанттул цIанийсса Хъунмасса дяъвилул ппурттувугу захIматрал фронтрайминная хъунмасса кумаг бивкIссар, жунгу тай жулва жагьилтурал чIарав жувагу бушиву ккаккан бансса иш дузал бан ччай бия. «Дараччилул» душваврал сахаватну ка кIидархIунни, кIива-шанма гьантлул мутталий мадарасса арцу дартIунни. Гьай-гьай, жулва хъунмур, гьанумур мурадвагу, аьралий ишругу къуртал хьуну, жулва оьрчIру ххувшаврищал цIуллуну шаппа-шаппай зана шавур. Вава мурадрайру, «Гьарзат фронтран, гьарзат ххувшаврин!» тIисса лозунграцIун бавкьуну, шаймур буллалиссагу», – увкунни Гульшан Хасаевал.
Бусанну «Дараччилул» гьашину РувхIанийсса центрданий лакрал ифтар дувангу кумаг бувшиву, мюхтажсса кулпатирттан, мушакъатминнан, кьини дуркминнан арцуйнусса, дуки-хIачIиялийнусса кумагругу бувайшиву.