Хасъсса аьралий операциялуву къучагъшиву ккаккан дурсса лакку оьрчIавасса ца ур Ккуллал шяравасса МахIарамлул арс МахIаммад Даххаев.
МахIаммад увну ур 2001 шинал май зурул 16-нний. Ванан 8 шин хьусса чIумал дунияллия лавгун ур вайннал ппу. Кулпат къашавайсса ниттихун багьну къабитан, МахIаммадлун, буттал хъар цайнна ларсун, чIивину унува зий, захIмат буллан багьну бур. Ва чIивинийва сивсусса, кьянкьа-кьурчIисса, жаваблувшиву дусса оьрчI ивкIун ур.
Армия лавхъун махъ ва цала хушрай лавгун ур хасъсса аьралий операциялуву гьуртту хьун. ЦIана къуллугърал бурж лахълай ур Запорожуллал областьрайсса Щербаки тIисса поселокрай. Шиккусса ца талатавриву вагу, ванащалсса аьралиталгу душманнал луркIандалухьхьун биривну бур. Ва усса батареялийн душманнал гужсса цIу дирхьуну, шанна танк бат дурну дур, аьралитурайн щавурду дирну дур. МахIаммадлул, нигьа къаувсун, бацIаву дакъа битлатисса ккуллардал цIарава уккан увну ур арула саллатI. Щавурду дирминнан цалчинсса медициналул кумаг бувну бур. Ва ишираву цувагу контузит хьуну ур.
МахIаммадлун паччахIлугърал награда дулун ккаккан бувну бур.
ЦIана МахIаммадлул 22 шин дур. Ванах ялугьлай бур нину ва кIия уссу. Ссавур вайннахьхьун дулуннав, МахIаммадгу дакI ххарину зана хьуннав.
