![](https://ilchi.info/wp-content/uploads/2023/02/fa28d2d2ce52a39d339d34d619ef935c-e1675501919978.jpeg)
Уттигъанну МахIачкъалалив чIяру зивурду дусса къатрацIух цIу ларчIсса чIумал нинугу, чIивисса оьрчIгу ххассал бувсса Виталий Ивлевлун Дагъусттаннал МЧС-рал Агьаммур управлениялул каялувчитурал буллунни Барчаллагьрал чагъар. Барчаллагьрал чагъар буллай, Дагъусттаннал МЧС-рал Агьаммур управлениялул хъунаманал хъиривчу Олег Колпиковлул кIицI лавгунни дагъусттанчувнал къучагъшиву ва сисаву.
– Жун пахру буссар жула республикалий укунсса, дакI цIуцIисса, захIматсса тагьардануву ливчIминнан кумаг бан хIадурсса, инсантал бушиврия. Виталийл дурсса тIул жагьилминнан эбратну хьунтIиссар, – увкунни ванал.
ДакIнийн бутан, январь зурул 26-нний, МахIачкъалалив, Лаптиева кIичIиравусса чIявусса квартирарду бусса цаппара къатраву газрал лахъсса давление сававну, ацIва квартиралуву, цал архIал, цIу ларчIуна. Ва иширал бардулт хьусса инсантурал телефондалул камералийн лавсун бур цIу ларчIсса ца къатлул чIарах нанисса Виталий Ивлев леххаву тIисса хъамитайпалун кумаг бан шамилчинмур зивулийн лавхъсса куц.
Щинал бургъулийх ва панжарттайх чIавахьулттийн лавхъун, ванал цал, канийн бувцуну, буккан бувну бур къатлува чIивитIу, яла, зана хьуну, кумаг бувну бур буккан ниттин. Ва ишираву ккаккан дурсса къучагъшиврухлу, Дагъусттаннал МЧС-рал Агьаммур Управлениялул тавакъюрайн бувну, Аьрасатнал МЧС-рал бакIчи Александр Куренковлул Виталий Ивлевлун ведомствалул чулуха награда дулун ккаккан бунни.