Январьданул 24-нний Дагъусттаннайн къуллугърал аьрххилий увкIунни Аьрасатнал мюхчаншиврул министрнал хъиривчу Тимур Иванов. Региондалул БакIчи Сергей Меликовлущал цачIу мунал ххал бивгьунни МахIачкъалалив «Ипподромрал» райондалий буллалисса школа. 1224 дуклаки оьрчIансса объект буллай бур «Дуккаву» тIисса национал проектрал лагрулий. Школа баврил давуртту къуртал дувантIиссар 2023 шинал.
ДакIнийн бутанну, 2022 шинал, «Демография» ва «Дуккаву» нацпроектирдал лагрулий проектругу дурну, буллай бивкIссар 110 дуккаврил объект: 51 школа ва 59 оьрчIал багъ.
Тимур Ивановлул ххал бивгьунни «Ипподромрал» райондалий 200 кIану бусса оьрчIал багъ, цIусса аьралуннал госпиталь буллалисса кIанттурду ва Каспийскаллал флотилиялул инфраструктура лядуккаврил давуртту.
