ДР-лул Национал политикалул ва диннал иширттал министерствалул сакин дурсса «Халкь чIявур – билаят ца бур» («Народов много – страна одна») тIисса республикалул конкурсрал финал хьунни итникьини МахIачкъалалив, «Президент-комплекс» ГБУ-луву.

Конкурсрал финалданийн личIи-личIисса номинациярттай бувкссар Дагъусттаннал 11 муниципалитетраясса 33 творчествалул коллектив, ваниннин кIантту-кIанттурдай ва округирттай хьуми этапирттай ххув хьусса.

Конкурсрал финалданий гьуртту хъанахъиминнал хьхьичI махъ лахълай, ДР-лул национал политикалул ва диннал иширттал министр Энрик Муслимовлул кIицI лавгуна ва проект щаллу дуллалишиву ДР-лул паччахIлугърал «Дагъусттан Республикалий паччахIлугърал национал политика бартдигьаву» тIисса программалул лагрулий.
– «Халкь чIявур – билаят ца бур» проект тIайла дурну дуссар Дагъусттаннал чIяву миллатирттал культура дуруччаврийн.

ЧIа тIий ура цинявннан цIуллушиву, дакьаву. Ва конкурсрал гьарца номинациялий ххув хьуннав гужма, хьхьи­чIунма. ДакI дарцIуну учин бюхъанссар хIакьину шикку ух хьусса цучIав икIан къабю­хъайссар куну. Жува циняв цассару, жува – хъунмасса Аьра­сатнал ца бутIару, – увкуна ванал.
Ихтилатру ялагу бувна ДР-лул Халкьуннал Мажлисрал КIулшиву дулаврил ва элмулул комитетрал председатель Елена Павлюченкол ва Дагъусттаннал Хъаннил союзрал председатель Интизар Мамутаевал.

Жюрилул гьарца номинациялий язи бувгьуминнан буллуна дипломру ва бахшишру. «Аьрасатнал халкьуннал национал ичIалурду» тIисса номинациялий 3-мур кIану бувгьунни «Лакия» тIисса майдандалул (ПатIимат Оьмаева). Вания гьарта-гьарзану чичинну кказитрал хъиривсса номерданий.
Конкурсрай мукунма гьур­тту хьуссар ваниннинсса кIирагу этапрай (райондалул ва округрал) 1-сса кIанттурду бувгьу­сса КIундиннал шяравасса Илада Ибрагьимовагу. Иладан шикку хьхьичIунсса кIану бугьан кьисмат къахьурчангу, министр Энрик Муслимовлул увкусса куццуй, ва конкурсрай ух хьусса цучIав икIан къабюхъайссар.