Раби-ул-аввал махъа-махъма Идавс МухIаммад Идавс (с.аь.с.) увсса барзри, аьдатрайн бувну, бусурман агьулданул ва барз гьан байссар мавлудру дуллай, Аллагьнал ХIабибуллахлуха санаъру дуллай.

Раби-ул-аввал гьашину тIайла бавцIунни октябрь зурул 18-ннийн.

---

Ва цуппагу бусурманнал календарьданул шамилчинмур барзри, хъинну агьам­сса, ххирасса зурун ккаллиссар. Раби-ул-аввал зурул ялагу хасшивуртту дуссар: Идавсил(с.аь.с.) Маккалия Мадиналив гьижра баву, цалчинмур мизит баву, цалчинмур нюжмар-чак баву ва цаймигу. Аллагьнал халкьунначIан рахIманну гьан увсса Идавс (с.аь.с.) ув­ссар раби-ул-аввал зурул 12-мур кьини. Гьашину му хъанай дур 27-мур сентябрьданий.

МухIаммад Идавс (с.аь.с.) увссар 571 шинал, аьрабначIа хъинну сийлийсса Кьурайштурал тухумраву, Аьбдуллагьлул ва Аминатлул кулпатраву, ув­ссар Аьрабнаву диний­сса кюрулун ккаллийсса Маккалив. Аллагьнал Гьанувманал ппу ивкIуссар ва дунияллийн укканнина, нинугу диркIуну ятинну ливчIсса оьрчI цал ттаттал Аьбдул- МутIалиблул, яла бутта­уссил Абу-ТIалиблул хъуна увссар.

Ва ятинсса оьрчIан буккин-чичин къакIулну бивкIссар, Ванан лахьхьин бувулт къабивкI­ссар. Дунияллийцири хъуни-хъунисса аьлимтал исват буллай бур ва куна хIурмат-сий дусса Идавс дунияллий цама къаивкIшиву.

Циняв билаятирттайсса бусурманнал ва барз гьан бувай, цивппа МухIаммад Идав­сил (с.аь.с.) умматрава ляв­хъунутIий, Аллагьнайн щукру буллай, Идавсил (с.аь.с.) оьрмулия, хасиятирттая буслай, мавлудру дуллай.

Аллагьнал жула дакIурдивун Идавсихсса (с.аь.с.) ччаву дутIиннав, цIакь дуваннав, мунал (с.аь.с.) ккаккан бувсса ххуллийх бачин каши дулуннав. Дунияллийн паракьатшиву дагьаннав! Амин!