Буттал буттахъая шихуннай нанисса Хъурдаккаврил байран, инттухуннай хъу дугьай чIун гъан хъанан дикIайхту, зунттал щархъаву хъинну гурну кIицI лагай. Кумиял шяраву гьашинусса Хъунхъузалтну бия жяматраву бусравсса бутта ва арс – МахIаммад ва Муртазааьли ХIасановхъул.
Утта дурккун дия Кумиял щар. Аьдатравун багьсса куццуй, кIюрххицIунмай Хъузалтрал ужагърайн бувкIун бия лакрал миллатрал лаххи-ликкиялувусса душру-хъами, шагьрурдаясса ва районнаясса чIявусса хъамал. Хъарасгу дархIуну, хIадур бувну бия хъу гъай учинсса дучри. Гьанна бивщунни Хъун хъузалтралгу, ялунчIин хъарас щун бакIрайн лавсминналгу.
Къурату кIура бавну махъ цинявппа бавтIунни авадансса ссупралухун. Мажлис бачин бувну ия шяраву бусравсса Илияс Сааьдуллаев.
Аьдатрайн бувну, шархьун дия илданун диял хьунсса бартри, лакку дукрарду, дучIан дурну дия дукьрахIан. Бивзун бия хъуни къазанну. ПуркIуралгу, шахьлахьисса нахIусса дукрардалгу кьанкь ппив хъанай дия щалла шяравух. Лагмава тIивтIуну бия авадансса ссупрарду.
ЯлунчIин хъарас щун ихтияр дуллалисса кьуру тапшур бувна Жилай Кьурбановлуйн ва Адам МахIаммадовлуйн.
Махъсса ппурттуву, шяраву бикIу, дунияллий бикIу, хьусса пашмансса ишру хIисавравун лавсун, ХIасановхъал кулпатрал маслихIат ккавккун бия мажлисрай личIисса тяхъашивуртту къадансса.
Оьрмулул бугьараминнал дуруна дуаьрду. ХIасановхъал барчаллагь увкуна цала байран хъун дан, чIарав бацIан бувкIсса цинявппагу инсантурахь.
– Щарнил жагьилтурахьхьун цIуллушиву дулуннав вай жулла аьдатру, ягу дурну, гихуннайгу дачин дан. ХъатIив чIяву баннав, кулпатру гьарза хьуннав, цинярда лакрал шяраваллал аргъ дизаннав. Ва байран савав хьуну буллугъшиву ва барачатшиву ххи хьуннав жула аьрщарай, – увкуна миннал.
Байрандалул лагрулий хьуна хъуниминнал ва мюрщиминнал дянивсса спортрал бяст-ччаллу: дучри ххяххан баву, ттуплий буккаву, лечаву, тIанкI учаву, пут личаву, ка дишаву, турникIрай гьаз шаву. Вай бяст-ччаллу ляличIинува ххирар мюрщи оьрчIан, гьуртту хьун бувкIун бия шагьрурдаяссагу оьрчIру. Вайннал умудру нахIакьсса бакъая, гьарица гьуртту хьусса оьрчIан дуллай бия бартри, арцуйнусса ва цайми бахшишру.
Ахирданий, цала байран хъунна дан бувкIсса хъамаллурахь, шану къалавхъун, дукрарду дуллай бивкIминнахь дакIнийхтуну барчаллагь тIутIисса ихтилат бувна Халисат ХIасановал.
Имара Саидова
