Оьруснал театрданул хъунмур залдануву цал уттигу бавтIунни Дагъусттаннал халкьуннал артистътал Лариса ХIажиевал ва АхIмад АхIмадовлул творчество ххирами. Ва концертралгу Ларисал ва АхIмадлул творчество бюхттулну ва кьиматрай душиврул барашин дунни.
Хьунни вания тамашачитурансса байран. Вайннал балайрдах мякь бувккун бивкIсса инсантурал щапI куну, ацIансса кIану бакъа, бувцIуну бия зал. КIанттурду бакъами щябикIансса кIанттурду бивхьуну бия ва ххуллухьгу. Залдануву лак бакъасса, цайми миллатирттал инсанталгу бия. ЧIалай бия Дагъусттаннал вайми миллатирттал инсантурангу жулва артистътал ххирану бушиву.
Лариса ХIажиева ва АхIмад АхIмадов, пагьму, гьунар бусса бушивруцIун, лакку макьанну гьаз дуллалисса, лакку балайрду бюхттул буллалисса инсантал бур.
КIулли Ларисан бюхттулсса даражалий концертру дан.
Концерт дайдирхьунни, цимил вичIи диширчангу, бизар къашайсса, Ларисал ва АхIмадлул усттарну учайсса «Зульфия» тIисса балайлийну. Концерт буниялагу лавайсса даражалийсса хьунни. Ларисал ва АхIмадлул балайрдах, цимил вичIи диширчангу, инсантал бизар къашай. Аслийсса лакку балайрдал кьимат бусса тамашачитал бигьалавгунну тIий бия. Ва хъанай бур артистътурал творчествалунсса яла бюхттулмур кьиматнугу. Лакрал халкьуннал аслийсса культура ва творчество магьирсса каруннихь душиву тасттикь хъанай бия.
Цила зумувну, цIу буну, даркьусса яннардугу ларххун, Лариса сахIналийн буккайхту бигьалагай тамашачитал.
АхIмадлуву, балайлул гьунардануцIун, ялтту буклай бия пасихIсса лакку мазрай буллалисса хъярч-махсартту.
Тамашачитал вайннал балайрдах мякь бувккун бушиву чIалай бия, вай сахIналия гьан къабитлай, хъатру ришлай, цIунилгу балайрду учин баврийну.
Шиккува кIицI къалавгун къабучIир, уттисса замана интернетрал каши, бияла хъунмасса бушиву. ТIайланнасса эфирданувух ккаклай, буруглай бия концертрайн бучIан къабювхъумигу. ХIасил, вайннал балайрду бия тиччава машгьур хъанай. Мукьра ссятрай лахъи ларгсса концертрай Ларисал ва АхIмадлул увкунни лакрал шаэртурал мукъурттийсса бюххансса балайрду.
Имара Саидова
