Арслан Шахмарданов Дагъусттаннал лайкь хьусса артист, балайчи, музыкант, композитор, аранжировщик. Кьинилул тIалав бувсса балайрдал бияла ялтту буклакисса ттизаманнул музыкалул дунияллий ванал творчествалул бугьлай бур ляличIисса кIану.

 Ванал щала творчество вичIидихьултрал аькьлу-кIулшилувун, оьтту-ттурчIавун буххайсса балайрдайну хIасул хьусса дуну тIий, мякь къалиххайсса буну тIий. Ванал балайрду баян ччан бикIай даин – дакI къуману дунийгу, ххари-хъиншиврийгу
Арслан Шахмардановлул учайсса гьарца балайлуву асар хъанай бур жула мархри, ппухълуннал аьпа, лавгмунил къюву ва бучIантIимунил буруккин.
Цала творчествалух Арслан уруглай ур хъинну мюрш ивкIун, дакIнихтуну. Балайрдансса махъру язи бугьлай ур мяъна-мурадрал вибувцIусса, аьчухсса.

МукъурттицIунсса макьан чичлай ур цува. Аранжировщик хIисаврайгу, заргал куна зий ур чIуниха, гьарца инструмент чIуницIун бакьинну, чIунил куртIшиву аьлтту данну. Композитор хIисаврай, ванан асар хъанай дур мукъуцIун, куцциравун дагьанмур макьан. Ванал балайрдаву дакъар царагу къалпсса нота.
Арслан акъар аьдада балай тIий, ва ур гьарца балайлуву миллатрал магьирлугърал код ябуллай. Ванал балайрдах вичIидишингу ччан бикIай даин, пикрирдугу, дакIгу вайннул марцI дуккан дуллай дуну тIий.
Ноябрь зурул 2-нний Лакрал театрдануву хьунтIиссар Арслан Шагьмардановлул юбилейрал мажлис.