Дагъусттаннал паччахIлугърал филармониялуву хьунни хъунасса композитор, СССР-данул халкьуннал артист Мурад Къажлаев дунияллийн увккун 95 шинал юбилейран хас дурсса концерт. Къажлаевлул творчество ххираминнан унгу-унгусса байранну хьунни буттал кIанттул магьирлугърал тарихраву хъунасса композиторнал бивхьусса захIмат ккаккан буллалисса концерт.
«ETHNO BAND» тIисса вокал-инструментал ансамбльданул тамашачитуран пишкаш дурунни композиторнал произведениярттая сакин хьусса авадансса программа. Тамашачитуран бавунни цимил вичIи диширчагу мякь къалиххайсса «Оьргъиридуш», «Махмурданул сезон» кинофильмравасса балайрду ва бусалардавун багьсса «Далалай».
Къажлаевлул творчествалуву цачIун хьуну дур Баргъбуккавал билаятирттал миллатирттал аьдатру ва европанал классикалул музыкалул пикрирду, оркестр кIулшиву.
«ЦIунилгу зунттавун» тIисса пьеса хьуну бур композиторнал дакIнива дурксса буттал кIанттунсса гимну.
«Гьай-гьай, ва бур гениалнайсса композиторнал музыка. Зу тIурча, мунин дурну дур ттизаманнул журалийсса ххаллилсса аранжировка.
Багьа бищун къашайсса захIматри тIиссара вай композициярттаву гьунар бусса инсантураща цIусса тарг ва ссихI бишин бюхъаву», – увкунни ДР-лул культуралул министр Зарема Буттаевал концертрая махъ артистътурахь барчаллагь тIий.
Концертрай гьуртту хьунни Мурад Къажлаевлул цIанийсса Республикалул магьирлугърал школалуцIунсса балайлул ансамбль «Гуниб», балайчитал Вайсул Жалилов ва Диана Тямадаева. Дирижёрнал пульт кIунттил бувгьуну ия ансамбльданул каялувчи, щалагу Аьрасатнал ва дунияллул халкьуннал дянивсса конкурсирттал лауреат Рашид Бекеров ва Москавлия увкIсса Аьрасатнал магьирлугърал лайкь хьусса ишккакку Алексей Губарев.
Зулайхат Тахакьаева
