Ларгсса нюжмардий Республикалул КIулшивуртту хьхьичIуннай даврил центрданий хьусса Дагъусттаннал бакIчиначIасса Элмулул ва кIулшивуртту дулаврил советрал заседаниелул тасттикь бунни Дагъусттаннал бакIчи Сергей Меликовлул республикалул кIулшивуртту дулаврил идарарттал, учительтурал ва дуклаки оьрчIал чулухуннай хъуннасса къулагъас дуллай ушиву.

Педагогнан ва насихIатчинан хас дурсса шинал хIасиллу дуллай, ДР-лул кIулшивуртту дулаврил министр ЯхIия Бучаевлул бувсунни, ларгсса шинал лажиндарай тIивтIушиву 4140 оьрчIансса кIантту бусса 26 оьрчIал багъ ва 7576 оьрчIансса кIантту бусса 17 школа, сайки 700 азарунниха ливчусса педагогтурал, насихIатчитурал, нитти-буттал ва дуклаки оьрчIал гьурттушинна дуршиву Педагогнал ва насихIатчинал шинан хас дурсса личIи-личIисса мероприятиярдай.
Дурну дур Расул ХIамзатовлул 100 шинан хас дурсса, 1 млн инсантурал гьурттушинна дур­сса, 35 мероприятие. Педагогнал шинан хасну дуккан дурну дур «Династия педагогов Республики Дагестан» ва «Почетный наставник сферы образования Республики Дагестан» тIисса хIурматрал лишанну. ХIукуматрал ва ведомствардал чулухасса наградартту дуллуну дур 3 азарунниха ливчусса педагогтуран.
«Точка роста» ва «Кванториум» оьрчIал технопаркру тIивтIуну бур 67 школалий, 41 школалий цIу буккан бувну бур материал-техникалул базарду. Сакин бувну бур 2 «IT-клуб» центр, 43 школалий воркаут площадкарду ва 10 мини-футболданул поле. Республикалий «Газпром» ПАО-лул чулуха бувну бур 15 спортплощадка.
Ларгсса шинал итабавкьуну бур дуклаки оьрчIру ххилансса 72 автобус. Машан лавсун бур Дагъусттаннал тарихрал 176, 4 азарва учебник, 199,1 азарва, ниттил мазрал ва литературалул учебник, 84,7 азарва — дагъусттаннал географиялул учебник.
Байбивхьуну бур «Мой Дагестан. Край, в котором я живу» тIисса 1-ми классирттал дуклаки оьрчIансса кIулшивуртту дулаврил проект иширайну зузи дуллай.
26 азара дуклаки оьрчI кьамул увну ур «ЮНАРМИЯ» тIисса щалагу Аьрасатнал аьралий-патриот суккушиндаравун. ХIакьинусса кьини 2,5 азара дуклаки оьрчI гьуртту хъанай ур ТОКС-рал кьюкьлуву.
9 азарунния ливчусса оьрчIал кIулшивуртту ларсун дур «Авангард» тIисса жагьилтуран аьра­лий-патриот тарбия дулаврил центрдай.
Ххишаласса кIулшивуртту дулаву мурадрай, иширайну дузрайн дуккан дурну дур 1428 проект.
Министрнал личIинура кIицI ларгуна тIалавну душиву «Футбол в школе» тIисса оьрчIансса проект. Гьашину Аьрасатнал Футболданул союзрал проектравун кьамул бувну бур республикалул 55 школа. 1302 школалий сакин дурну дур футболданул лигарду. 2023 шинал республикалий «Школалул футболданул лигалувун» цалчин кьамул дурну дур душваврая сакин дурсса 25 команда. 1279 школалий хIасул бувну бур спортклубру, 1072 школалий, театрдал кружокру ва 306 школалул музей.
Сентябрь зурул 1-нния шийнмай республикалул школарду хIала хьуну бур «Моя школа» тIисса Федерал паччахIлугърал информациялул системалувун. ТIивтIуну бур 149 психолог-педагогтурал класс, 150 профильный класс, миннува 8 класс — инженертал хIадур байсса.
Республикалий цалчин щаллу дурну дур низамрава къабув­ккун ГИА-рду дуллансса шартIру. ДР-лул КIулшивуртту дулаврил министерстволул дайдирхьуну дур учительтурая бюрократиялул дишаларду дукьан дуллали­сса давуртту.
Сергей Меликовлул цала ихтилатраву кIицI лавгунни, Педагогнал ва насихIатчинал шинал мурад учительтурал пишалул сий гьаз даву бакъассагу, кIулшивуртту дулаврил ххуллий хьунабакьлакьисса масъалартту аьлтту баву хъанахъишиву.
Республикалул бакIчинал лавайсса кьимат бивщуна Центрданий тIиртIусса выставкалун. Ва выставкалий бия миллатрал багьу-бизулия бусласи­сса 23 майдан. Цинявппагу майданнай дуклаки оьрчIал кка­ккан бувна творчестволул ва искусстволул мастер-классру. Шикку личIинува итталун багьлай бия бархъаллал тIахIунтту дуллали­сса мюрщисса оьрчIру. Каспийск шагьрулул 33-мур оьрчIал багърал душ Аьйшал цила мюрщисса каруннил синааьрщарая дурну дия Республикалул бакIчинан бахшишрансса тIахIни.
Советрал заседаниелий гьуртту хьусса, дуккавриву хьхьи­­чIунсса оьрчIал гьунардал махIаттал увсса бакIчинал махъ буллуна шикку гьуртту хьусса оьрчIру Дарбантлийн ва Москавлийн экскурсиярттайн тIайла буккансса.
Ларгсса бигьалагай кьинирдай Сергей Меликовлул, цала буллусса махъ бацIан буван, дуклаки оьрчIру тIайла бувккуна Дарбантлив. Шикку вайннан хIадур дурну дия авадансса программа. Экскурсиялул дайдихьу дурна Дарбант шагьрулул 14-мур школалия. Школалул чIава корреспондент Диана Аьлиевал дуклаки оьрчIащал дурна аьрххилул асардая цIухху-бусу буллалисса телепередача ва рирщуна дакIний личIансса суратру. Хъирив оьрчIру бивуна Нарын-Къалалийн.
Советрал заседаниелий гьуртту хьусса цинявппагу педагогтал кIицI лаглай бия Республикалул бакIчи хьхьичIунну зий, захIмат буллалисса педагогтуран ччимур ххуллу тIитIин хIадурну ушиву.
– Дагъусттаннал бакIчинал хъуннасса къулагъас дуллай ур республикалул педагогтурал масъаларттах. Мунинсса барашиннану хьунни ванал каялувшиннаралу хьусса Элмулул ва кIулшивуртту дулаврил советрал заседание. Сергей Меликовлул чIурчIав дурна педагогтурал пишалул сий гьаз даврил ва квалификация дусса педагогтурал кадрарду хIадур баврил даража лавай баврил ялув бацIаву дан аьркиншиврий. ХьхьичI хху­ттай бивхьуна жагьилсса ник тарбия даврил, оьрчIаву гьунарду аьлтту баврил, ххишаласса кIулшивуртту дуллансса шартIру дузал даврил масъалартту, – увкуна ЦIуссалакрал райондалул кIулшивуртту дулаврил управлениелул хъунмур Светлана Къудаевал.
– Советрал заседаниелийн гьуртту хьун жуйнма оьвчаврихлу барчаллагьрай ура. Укун­сса мероприятиярттай сукку бай кIулшивуртту дулаврил ххуллий хьунабакьлакьисса цIурувкьюсса масъалартту, ххал бигьай ми дузал бансса мюнпат бусса ххуллу-чаранну. Му бакъассагу, ххишала хъанай дур куннал кувннацIа даврил опыт ласунсса сант, – увкуна Ккуллал райондалул КIулшивуртту дулаврил управлениелул хъунаманал бигарду биттур буллалисса Жамалуттин Оьмариевлул.
Ахирданий, АьФ-лул Просвещениелул министерстволул ва ДР-лул Элмулул ва кIулшивуртту дулаврил советрал чулухасса наградартту дуллуна хьхьичIунну зузисса учительтуран, директортуран, колледжирттал педагогтуран ва тренертуран.
Имара Саидова