Дагъусттаннай ятту кIинтнил минардайн биян бувансса мурадрай ххуллийн бувккунни хIухчалт. Аьмну зунттава арнил кIанайн биянтIий бусса бур кIива миллиондалияр ххишаласса ятту.

Аьдатрай: интту –зунттавун, ссуттил – арив. Танийра укунсса журалий цIакь хьуну духьувкун ятту ябаврил система.
НТВ-лул машгьурсса журналист Оьмар МахIаммадовлул вай гьантрайсса сюжетраву бувсунни Лакрал райондалия ятту куч баврил даву цукунсса бущилий най дуссарив. Караматну ххуйну чIалачIисса тIабиаьтрал ва дирину нанисса яттил ттурзаннаясса видеосуратирттал лях-карах эфирданий му даврия ­аьщуйн щуну бусан бувккунни райондалул Шяраваллил хозяйствалул управлениялул хъунама ХIажи ХIажиев, ЧукIуннал кооперативрал каялувчи ХIаммада Маршаев, хъунама хIухчу Багьадур МахIаммадов, хIухчу АлиасхIаб Гитинов.

Вайннал кIицI лавгунни, гьашину хъунисса марххалтту бувну, мугьалтту бувккун, ххуллурдайн, ламурдайн зараллу хьуну бухьувкун, гьашинумур аривсса ххуллу лахъи буккантIишиву. Мукунма лекьрурду дагьаврия, лахIунтту дуцавриясса нигьачIинна духьувкун, хьхьичIванияр мюхчанну бикIан багьлай бушиврия. Гьаннайсса, хIухчалтрал къабигьасса даврия ва ххуллия Оьмар МахIаммадовлул бувсунни цала зумувну усттарну, зунттал билаятрах ччавугу дагьанну, ризкьичитурал захIматрал хIурматгу багьанну. Ва ялагу, кьянатссар тIисса тIабиаьтрая ябатIин къахьунну ва зунттал ххуйшивручIан ккавкцириннал дакIру кIункIу дуванну.
Лихъа-хъиривхьулий гьантIиссар кIинтнил барзру. Инттухавай чялиш буккантIиссар хIухчалтгу ятту зунттавунмай куч буван.
Даркьусса, бигьа-рахIатсса кIи хьуннав, ятту цIуллуну, саламатну ягу буван хьуну, чIируннал ттурзаннугу барачатну ххи бувансса.