Ларгсса нюжмардий МахIачкъалалив, «Дагестан» РИА-лий, Рамазан зурун хас бувсса «Яла ххуймур барз» тIисса акциялул хIасиллу дуллалисса пресс-конференция хьунни.
Журналистътурал суаллахьхьун жавабру дуллунни «Tooba» приложение хIасул дурсса Рамазан Мажидовлул. Ванал бувсунни, кIицI лавгсса акциялул лагрулий бавтIшиву 267 миллион къуруширттал, шиная шинайн тIиссакссагу, ихIсандалул, рахIму-цIимилул давурттан ка кIидахIин ччиминнал ккал-аьдадгу хъунна хъанай душиву, Аьрасатнал цайми регионнай, кьатIаллил билаятирттай яхъанахъиминнаягу арцу дучIайшиву. КIицI лавгунни личIи-личIисса диннал агьлу гьуртту шайшивугу. Бувсунни приложениялий утти, мачча-гъанминнал цIаниягу арцу тIайла дуккан шайсса, «Хъиншиву бахшишран» тIисса функциягу зузи бувшиву.
«ИхIсандалул фондру чансса бакъар, амма жу миннува яла вихшала дишинминнул, сантирай ва лябуккулий зузиминнул маркетплейс хъанахъиссару. Ххюнниха лирчусса шиннур жул ва давриха зий. Хъиншиврул, хъинбаларттал иширттан 2,5 миллиард уттинин бавтIссар, харж бувссар, приложениялийхчIин 700 азара инсаннан кумаг бувссар. ЦIу-цIусса технологияртту ишла дуллай буру, мукунма искусственный интеллектгу», – увкунни ванал.
Бувсунни приложение хIиллакартурая, хIарамзадатурая мюхчанну дурурччуну душивугу. АцIра къурушрая тIайла хьуну, ца миллиондалийн дияннинсса арцу дучIайшиву кумаг буван ччиная.
«Февраль зурул ахирдания тIайла хьуну, март зурул 30-ннийн бияннин приложениялул кумаграцIух дартIсса арцуцIух 1041 сбор ларкьуссар. Зувиазарунниха ливчусса инсантурачIан кумаг биянтIиссар. На буниялттунгу хъиншиврул ххуллийсса давуртту машгьур хъанай душиврия ххарину ура», – увкунни Рамазан Мажидовлул.
ПатIимат Рамазанова
