Аьли Айдаев
Ватан ттяй–кьяй дакъари
Ккавккунни караматсса
Ниагар-жюружани,
Шяв щуннин щинаяту
Ттиркьюкьал ккузри шайсса.
Ккавккунни ляличIисса
Шагьру ттун щинай бувсса,
КунначIан кув хъамалу
Щинал щатIайх занайсса.
Ккарккунни эмаратру
Ттун вай дакъа цаймигу.
Унна, валлагь, хIайрангу,
Ххуйшиврул махIатталгу.
Амма къадунни вайннул
Цаннив, ттул дакI ришлаши,
Я щайхту, дайсса кунна,
ЧIяяратIнил ва Ламул!
Лажинни ци гуж бурвав,
ЧIирисса ЧIяяратIний,
Ниагар-жюружанттул
Къабувсса асар хьун бан?
Ци кьуватрал заллурвав,
Аьнт утта Щиннух-Ламу,
Венеция шагьрулул
Къабувсса асар хьун бан?
ЧIяяратI, Щиннух-Ламу –
Ттул ппухълуннал минари.
Ттул гужри! Ттул кьуватри!
Аьзиз буттал Ватанни!
***
Ватан ттяй-кьяй дакъари,
ХIаз лавсун, кьаритайсса!
Ватан чурххал базури,
Экьибутан къашайсса!
Чулу къашай ччавури!
Мякь къалиххай балайри!
Яла нахIумур ччатIри!
Яла чаннамур баргъри!
***
На ва дунъяллийн увксса
Оьрмулухсса ччаврилла,
Ва нава заназисса
Аьрщарал хIурмат банна.
На вай кару рартIусса
Зунни, захIмат булланни,
Ва ттула ужагъраву
ЧчатI ва нис чан къахьунни.
Ва душ, вай оьрчIру бувсса
Аьрщи ятин къахьунни.
Нитти-буттал вилаххав
ЦIу лещан къаританни.
На ва дунъяллийн увксса
Оьрмулухсса ччаврилла,
Ва нава заназисса,
Аьрщарал хIурмат банна.
Хъинманал хъинмурди чин
Мурхьирая щяв багьсса
ТIутIул чIапIуй ччан къахьун,
На, гъан ххуллу кьабивтун,
Лагара архмур ххуллийх.
ЗахIмат хьувча, уххувча,
Ччаннай усру тIатIийча.
Так ттуя, ттул тIуллая
Лагмаминнан хайр хьувча!
Даймур, бяст-ччаллий дара,
Ххув шара, ухгу шара
(Ва дур дунъяллул аьдат,
Оьрмулул тIул-тIабиаьт).
Ххув хьурчан, ххари шара –
БакI ссукIа къадугьара!
Ух хьурчан, пашман шара –
БакI хьхьичIун къарутара!
Леххаврий наниманан
Ххуллу итабакьара,
«На акъа цура!» тIинахь
«Юх, нагу чувра!» чара.
Куннал ттуя цIа дай тIар,
Куннал кьадар ара тIар…
Оьнал ччимур учача,
Хъинманал хъинмурди чин!
Мархха зучIари бусса
Хьхьиямуруллул чIулттай
Кюртти був къукъухьхьирув,
ЧIаххул чIарату лавгун,
Шикаятрай бикIарув?
Хъару шайх, кюрттараву
Мукьва оьрчI яшайссарив?
Ца кIачлий мукьва кIункIур
Щаращи бан шайссарив?
Ца буттал кюрттарая
Утти мукьва хьуну бур.
Хъамабитан шайссарив
ЯтIувахъаллил зунтту!
ДакIния буккайссарив
Бюруаривсса кьунтту!
Арцу-мусил буну тIий,
Акъара ми дакIнийну,
Буттал ватан дуну тIий,
Ура дакIний чивчуну!
Хьхьиямуруллул чIулттай
Кюртти був къукъухьхьирув,
Къяртри чун диярчангу,
Мархри зучIари бусса.
***
Ккавкссарив вин кьунттулу
Дяркъу щинал щаращи?
Бавссарив, дус, вил вичIан
Щаращул щинал жюр-жюр?
Га мякьсса ххуллулссаннайн
Хъамалу оьвтIисса чIур.
Ккавкссарив вин ххуллулсса
Щаращул щинайн ппай тIий?
Никругу лахIан дурну,
Щаращуйн икрам буллай?
Га цанма був хIурматран
Барчаллагьри тIутIисса.
Ссан аьркинссар махъру
Цан ура ттухь карчI дакъа
«Ччиссай!» тIий, рагъан ккалай?
Ччаву хьума, махъ бакъа,
Хъириврихха ачайсса…
Яруннил макьан дуцлай,
Цан ура хьхьичIун уклай?
Ччаву хьуманал яру
Нач-карчIнурхха бикIайсса…
Цан ура, хьхьичIгу авцIун,
Кару щурущи дуллай?
Ччаву хьуманал кару
ДархIунурхха дикIайсса…
Цан ура, ттун дуниял
Дулунна тIий, хъа буллай?..
Цал дуллусса дуниял
КIилчингу дулайссарив?
Ссан аьркинссари махъру,
Булайсса, зия байсса?
Гьан да баралун усру,
Ттул хъирив занай, тIартIсса!
Бухху, ххирамур, бухху
Бухху, ххирамур, бухху
Ва ттул рухI-ссихIиравун,
КIукIлу-кIяла марххала
Зунттал зунчавун кунма.
Бухху щяв щун бувасса
МарцIсса гъарал кIунтI кунма,
Ссавруннай цIуну лавхъсса
Нурданул чирахъ кунма.
Мажнуннул асардавун
Аьрав душ Лайли кунма,
Идавсил оь-ттурчIавун
Ххадижат-бархху кунма.
МарцIсса гъарал кIунтI кунма,
Агар ина буххарча,
Хъу хьуну, лухччи хьуну,
Хьувух бивхьун зананна.
Агар ина буххарча,
Нурданул чирахъ кунма,
Марч къащун, дяркъу къащун,
КъюкIливу кIану банна.
Агар ина буххарча,
КIяла марххала кунма,
Барзунттал занчру кунма,
ХъачIрай бивтун ябанна.
Ца чIучIа…
На зунттуйнгу лавхъссара,
Зунттуягу агьссара.
Агьлай, агьния излай,
Завагу ура ласлай.
Завагу ларсъссар марцIну –
ХIилла-пилла къадурну:
Агьния нава излай,
Щаву нара хъин дуллай.
На хьуссара ккашилгу,
Хьуссара, валлагь, мякьгу.
Амма хIалалсса бакъа
КъахIавчIссар щинал къукъу.
Так яру ххуйсса душнийн
Ппай увкуссар гъирарай…
Бунагьри тIий бухьурча,
Бувача Заннал танмихI!
Валлагь, аллав къачинна,
Паризари учинна:
Ппай увксса талихIран
ТанмихIри тIар ца чIучIа!
Аллагьнал кабакьиннав
Аьрххи-ххуллийн увкманан
НякI ссавнил кумаг баннав,
Агар кьини дуркманал
Леххаврий най ухьурча.
Жабраил малаикнал
Хъару ялтту личиннав,
Ппу ялув акъа ятин
Ххари бан най ухьурча.
Чурххайн щусса ккулларду
Чурххан малхIанну хьуннав,
ХIалалсса питналуву
ХIарансса ккулла щурча.
Аллагьнал кабакьиннав,
Мурадирайн ияннав,
ДакIнивусса мурадру
Паризасса бухьурча.
