Июль зуруй Дагъусттаннал цIуллу-сагъшиву дуруччаврил министр Аьлиоьмар АхIмадовлул тапшур бувна медициналул идарарттал хъуними хIакинтурайн гепатит С дусса къашайшалтрансса препаратру ласун, азар кIул даву мурадрай бюхъавай чIявусса агьалинал цIуллу-сагъшиврул тагьар ххал дан ва пациентътурал регистр низамрайн дуцин. КIива зурул дянив ми гьармур щаллу дуршиву цифрардал чIалачIи бунни.

– Инсан хъин ан аьркинссар, чув ялапар хъанахъисса ухьурчагу. Дяхттасса стационардай гепатит С дусса къашайшалт хъин буллалисса циняв медициналул идарарттайн тапшур бав аьркинсса дарурттал дузалшинна дан. КIива зурул дянив 237 инсан ялунгу оьрмулун нигьачIаву дусса азарунния хъин бан бювхъунни. Утти хъуними хIакинтурал буржри азар ччяни кIул дурну, гьарица къашайшала гепатит С азаруннил вирусрацIа ан, – кIицI лавгунни Аьлиоьмар АхIмадовлул.

Ванал бусласимунийн бувну, хьхьичIва аьркинсса даруртту шанма медициналул идаралий бакъа къабивкIхьурча, утти ми циняв дяхттасса стационарданул идарарттай бур. Ца къашайшала хъин аву 300 азаруннийн дирсса къурушран дацIлай дур. Хъин бувсса къашайшалтрал сияхI 265 инсанная 502-ннайн диллай дур ( 89% ххишалану). Диагностикагу гьарта-гьарзану дурну дур. Цалчинсса ххюва зурул дянив гепатит С кIул даву мурадрай ххал увну ур 31800 инсан. КIива зурува сияхI 53 573 инсаннайн дирну дур. Инфекция ччяни кIул дурссаксса ттиликIран зарал биянсса нигьачIаву чансса дур. Утти пациентътурал регистрданий 2786 инсан ур гепатит С дусса (хьхьичIвасса 4976 инсаннан кIанай).

Андриана Аьбдуллаева