Аьрасатнал Дакьаврил фондрал Дагъустаннайсса отделениялул, Лакку маз цIулаган баврил ихIсандалул гуманитар фондрал, Дагъустаннал ихIсанданул «Барачат» фондрал, ДР-лул ПаччахIлугърал Советрал член Гъ. М. Гъазиев бакIчисса Жяматрал Советрал сипталийну бавтIсса, «ХIакьинусса лакку мазрал тагьар ва му хьхьичIунмай шаврил ххуллурду» тIисса темалун хас бувсса «Ккуркки столданул» резолюция
МахIачкъала 2003 ш. 29 май.
«Ккуркки столданул» давриву гьуртту хьунни лакрал элмулул ва педагогикалул агьулданул, творчествалул союзирттал вакилтал, массовый информациялул средстварттал зузалт ва каялувчитал, школардал учительтал, районнал образованиялул управлениярттал вакилтал, районнал администрациярттал хъуними ва миннал чулухасса вакилтал. БавтIминнал хьхьичI барча баврил махъ лавхъунни ДР-лул ПС-рал член Гъ. М. Гъазиевлул. «Ккуркки стол» батIаврил мурадрая ва мунил хьхьичI бивхьусса масъаларттая бувсунни Дагъусттаннайсса Аьрасатнал Дакьаврил фондрал отделениялул председатель Н. М. Хачилаевлул. Заседаниялий бувккунни 9 доклад, цаппара хIадур дурсса махъ лахъавуртту хьунни миннуву цIанасса лакку мазрал нигьачIисса тагьарданул хIакъиравусса буруккин аьч хьунни, лакку маз ябансса ва хьхьичIунмай бансса ххуллурдая ва кьяйдардая ихтилат хьунни.
Лакку маз яшаврин нигьачIаву дусса фактордуну заседаниялуву гьуртту хьуминнал ккаклай бур:
1.Шяраваллал агьалий шагьрурдайн бизлазаврищал бавхIусса процессру. Ми сававну цала буттал аьрщарай ливчIун бур 20% лакрал.
ЦIуллу-цIакьсса, захIмат бай оьрмулувусса халкь, хаснува жагьилми, зунттал районнава нех дирхьуну шагьрурдайн бизлазаврил сававну хъанай дур республикалул руководствалул инсаннайн лажинсса, мяълумсса, эффективсса социал политика дакъашиву. Даву дакъашиврул, чиновниктал бахчилачаврил, аьрщарал хIакъиравусса масъалартту ца чулухун багьну бакъашиврул агьалинал гьунттийсса кьинилийнсса хьул кьукьлай бур, жагьилтал ливну най бур, цала маэшат ххуй бан бавккусса ххуллурду язи бугьлай. Мяълумсса социалсса ва миллийсса политика дакъашиврийн бувну Лакрал ва Ккуллал районну бюджетрал иждивенцинайн кIура даллай дур.
2.ПаччахIлугърал чулуха мазурдил хIакъираву эффективсса политика дакъашиву, хаснура жула республикалий. Мунияту хъинну лагьну дур Дагъусттан халкьуннал цала мазурдихсса бургаву, ми сан къабуллалисса, аьркин бакъашиврий бихьлахьисса кIанттурду бур. Мунищала бавхIуну хъинну хьхьарану бур школалий ниттил мазурдил дарсру дишаврил даража, хъинну яларай дагьну дур ниттил мазурдийсса печатьрал продукциялул качество, миннуву чIявусса личIи-личIисса журалул гъалатIру итабакьлай бур.
Миллатру чIявусса регионнай мазрал масъала миллий политикалул вирдакIну хъанахъисса (диндалущал ва культуралущал архIал), цанчирча гьарца инсаннал цува цумур миллатравун ухлахиссарив му миллатрал мазрайхчIинну кIул байсса. Мазурдил масъаларттал биялсса кIану бувгьуну буссар дунияллул билаятиярттал дянив ишласса прававой документирттавугу. Аьрасатнал Федерациялувусса миллатирттал мазру ябансса гарантия дуссар Аьрасатнал паччахIлугъралгу цийнна ларсун. Му бурж щаллу буллай, мадарасса давуртту дурну дунугу (ниттил мазру школардай лахьхьаву, учебникру, ниттил мазрайсса луттирду, кказит-журналлу итабакьлакьаву; радиолий, телевидениялий ниттил мазурдийсса передачартту душиву, ниттил мазрай зузисса театрду бушиву, амма ва даврия биялсса мюнпат хъанай бакъар, мунил сававртту дур:
а) мазру буруччаврил гарантия мяйжан дуллалисса мяълумсса мазурдил политика дакъашиву;
б) специалистал (ниттил мазурдил учительтал, журналистал, литературалул ва театрданул зузалт, издательствардал корректортал ва м.ц.) ххуйну хIадур бансса печатьрал продукциялул качество гьаз дансса материалий база заэвсса бушиву;
в) бюджетрал сфералувусса зузалтрал харжру мюрщисса бушиву — миллатирттал мазурдий элмулул ва творчествалул продукция итадакьаву ххишаласса захIматгу, харжгу аьркинсса ишри.
Республикалул властьрал органну мазрал политикалул масъаларттах цукун буруглагиссарив исват буллай бур вай мюрщисса мисаллал:
-хIакьинусса кьининингу кьамул къадурну дур кIира-шанна шинай ДР-лул Халкьуннал Мажлисрал пландалувусса «Дагъусттаннал миллатирттал мазурдил хIакъиравусса Закон»;
-уттигу республикалий дунияллийн дуккан къадурунни махъра-махъмур агьалинал перепись хIасиллу; специалистуран кьура шинал хьхьичIсса сведениярттай гьашиву дуллан багьлай бур.
3.Жяматрал цаппара ккураннаву мазурдих укуннасса кьайкьуйлух куннасса бургаву дачин дурну бушиву, ми аьркин бакъашиврун ккаллину, миллат маз бакъанугу яшайшиврий бихьлай. Ниттил мазру кулпатравагума личин буллай бур. Цаппараннал зумату баллалисса, инсанналми ихтиярду миллатиртталминнуяр хьхьичIунссар тIисса демагогсса мукъурттил ниттил мазру, миллатрал культура сан къадуллансса хIучча бириян буллай бур, жагьилсса никирал пикри-зикри баччан буллай бур.
Вай кIицI лавгсса хIуччардугу, мазрал цIанасса тагьаргу хIисавравун ларсун, «Ккуркки столданул» участниктурал маслихIат буллай бур:
1.Лахъисса чIумуйсса «Лакку маз ябаврил, буруччаврил ва хьхьичIунмай баврил» программа дузал дан, муниву ккаккан дан му программа щаллу дансса давуртту.
Му программа щаллу давриву кумаг бан буржлувссар (мукъуйнугу, иширайнугу) паччахIлугърал органну. Мунил юридический гьанугу хъанахъиссар Аьрасатнал Конституция (с. 68), Дагъусттаннал Конституция (ст. 10), АьР-лул мазурдил хIакъиравусса закон.
2.ДР-лул ПаччахIлугърал Советрая ва ДР-лул Халкьуннал Мажлисрая тIалав бан «Дагъусттан республикалул мазурдил хIакъиравусса закон» анаварну кьамул даву ва му закондалий циняв Дагъусттаннал халкьуннал мазру ябаврил гарантияртту дикIаву, цанчирча бакIлил миллатругу ябаврил хъунмур шартIну хъанахъиссар миллатрал маз ябаву.
3.Лакку маз ябаврил, буруччаврил ва хьхьичIунмай баврил программалувун укунсса пунктругу бичин маслихIат буллай буру:
1) Гьарца шартIру ишла дурну, дачин дан лакку маз кулпатрал мазну цIакь шаврищал дархIусса, оьрчIан ниттил маз лахьхьин бан нину-ппу буржлув буллалисса пропаганда.
2) Лакку маз ва лак ябаврил яла агьаммур шартIну ккалли дан Лакку кIану утта буккан баву; Лаккуя лак бизлазаву дацIан дан, кIиккусса агьалинангу, махъунмай кIура баен ччиминнангу къулайсса шартIру дузал даврил ххуллий зун.
3) Лакку мазрайсса информациялул идарарттан, «Илчи» кказит ва Лакрал радио хьхьичIну, бюхъайсса кумаг бан, миннуя миллат цала лагма цачIун байсса центр бан.
4) Телевидениялий мудан зузисса миллатрал канал тIитIаврил хъирив буккан, муния кумаг хьунтIиссар оьрчIан ниттил маз лахьхьин бан.
5) Шагьрулул оьрчIал учреждениярттаву лакрал группарду тIитIинмур бан.
6) Творчествалул интеллигенция, учительтал, пасихIну маз кIулсса инсанталгу хIала бувну маз лахьхьаврин ишла дансса аудио ва видеоматериаллу хIадур дан.
7) Лакку мазрал учительтал хIадур баврил даража гьаз бансса ххуллурду ляхъан.
8) Луттирду итабакьаврин кумаг буллан: личIи-личIисса журалул словарьду, оьрчIансса литература, цайнува цала маз лахьлансса луттирду.
9) Гьунар бусса жагьилтал творчествалул пишардай зун кIункIу баврих аякьа дан (артистал, чичулт, шаэртал), миннал республикалулгу, Аьрасатнулгу вузирдавун буххан кумаг бан.
10) Бугьара хьусса аьлимтуран-лингвистуран бадал хIадур баврих къулагъас дан, республикалул вузирдал лакрал отделениярттайн гьунар бусса жагьилтал кIункIу буллай.
11) Лакку мазрал, литературалул, историялул, культуралул исследовательтурал чIарав бацIаван.
12) Саргъунну оьрус мазгу, лакку мазгу ишла баврил ялув бацIан: ца маз гамунихун бахкъачайссар, гьарцаннул цила кIану буссар.
13) Шяраваллил школардансса лакку мазрал учебникирттал даража лавай бан, шагьрулул школардан цанма хасъсса учебникру баврицIун ка -бакьин.
14) Лакку мазрай журналлал хаснува оьрчIанмунил, хъаннинмунил чIарав бацIан, ми хьун бан шаппа лакку маз лахьхьаврил пропагандистал.
15) Гьарца шинал лакку мазран хас дурсса байранну шагьрурдай ва шяраву дуллан.
16). «Лакку мазрал ва литературалул центр» дузал бан, му давривун дугьарамур ва жагьилмур никирттал лак кIункIу буллан.
