ХIакьинусса кьини хасъсса аьралий операциялий гьуртту хъанахъисса аьралийтуращал архIал медикталгу хъуннасса хъар лахълай бур. 2023 шинал августрай контрактгу чирчуну, хасъсса аьралий операциялий гьуртту хъанай бур ЦIуссалакрал райондалиясса Роза МахIаммадовагу. Ва бувну бур 1985 шинал ЦIуссаккуллал шяраву. ОьрчIнийва цимурца кIул хьун ччисса, дуккавриву итххявхсса, школалул оьрмулуву чялишну гьуртту шайсса душ бивкIун бур ва.
Школагу къуртал бувну, ва дуклан бувххун бур Дагъусттаннал медициналул колледжравун. 2007 шинал бувкIун бур Н. Мирзоевлул цIанийсса ЦIуссалакрал райондалул азарханалий зун. Цила даву дакIнийхтуну дуллалисса, къашайшалтраха аякьа дусса, бавкьуну зузисса Роза хIурмат-кьиматрай бивкIун бур коллективрал дянив.
Розал хасъсса аьралий операциялий гьуртту хьунсса хIукму кьамул баврия рязий бакъа бивкIун бур мачча-гъанми.
Ванил тIурча, балжину бувчIин бувну бур аьралийтуран кумаг баву цила бурж хъанахъишиву.
ХIакьину позывной «Цветочек» бур хасъсса аьралий операция нанисса зоналий хирургиялул отделениялул медсестрану, жула цикссагу аьралийтурал оьрмурду ххассал буллай.
Роза гьуртту хьуну бур Донецкаллал ва Луганскаллал Халкьуннал Республикарттайсса, Запорожский ва Херсонский областирдайсса оьсса талатавурттаву. Операционный медсестрану зий Розал хъуннасса жаваблувшиву цила бакIрайн ларсун дур. Цила оьрмулун нигьачIаву душиву бувчIлай бунугу, хIакиннал бурж лайкьсса даражалий бартбигьлай бур.
ЧIярумур чIумал ванин багьайсса бур хьхьувай щавурду дирсса аьралийтал буккан буллан, миннан чIун-чIумуй медициналул кумаг бувну, санчастьрайн биян буллан. Уздансса хъамитайпа Роза МахIаммадовал кьянкьашиврул ва сисаврил махIаттал буллай бур лагма-ялттуцири.
СВО-лий гьуртту хъанахъиссаксса хIаллай щавурду, цIунцIияртту хьусса аьралийтал ххассал баврихлу ва лайкь хьуну бур «За спасение погибавших» тIисса медальданун.
Къаххирар Розан хасъсса аьралий операциялия буслан, цала гъан-маччами хъювсул буккан буллан.
Имара Саидова
