«Не могут люди вечно
Быть живыми,
Но счастлив тот,
Чье помнить будут имя»

А. Новаи

Вай гьантрай, Лакку билаятрай машгьурну бивкIсса Шамсулварахъал МахIмулул ва ЦIугьур Шяпихъал ПатIимал арснан, психологиялул профессорнан ХIасанхIусайн МахIмудовлун хьун аьркинссия 90 шин… Цибанссар? Цуманан цуксса оьрму буссарив так бюхттулсса Заннан бакъа къакIулли.
ХIасанхIусайн увссар ноябрьданул 20-нний 1934-ку шинал Ккуллал райондалий ЧIяйннал шяраву.1953-ку шинал школагу къуртал бувну, дуклан увххун ур ПаччахIлугърал университетрал чил мазурдил факультетрайн. Тай шиннардий университетраву ХIасанхIусайннущал дуклай бивкIссар Султанов Киров, АхIмадов Сулайман, Зуллиев Аьлил, Исяев НухI, Увайсов Ссугъури (аьпа баннав цал). 1955-1956-ку шиннардий, вай цинявппа, ЧIяйннал школа1953-ку шинал архIал школа къуртал був­сса ряхагу выпускник, ДГУ-рал ХIурматрал улттуйн лахъан бувну бивкIун бур. Университетгу ЯтIул дипломрай къуртал бувну, ва зун айивхьуссар Ккуллал дянивмур даражалул школалий немец мазрал учительну, 1962-1965 шиннай райОНО-рал методкабинетрал хъунаману, ЧIяйннал школалий учительну.
ХIасанхIусайн хьхьичIа-хьхьичI хьусса чил мазурдил му­аь­ллим хъанай ия Ккуллал район­далий.1966-ку шинал увхссар Москавуллал Н. К. Крупскаял цIанийсса пединститутрал психологиялул касмурдал аспирантуралувун.

1968-ку шинал дурурччуссар диссертация, зун айивхьуссар Дагъусттаннал пединститутрал педагогикалул ва психологиялул кафедралий. Ва даврий ванал элмийсса давуртту хIисавравун ларсун, тIивтIуссар хьхьичIва-хьхьичI Дагъусттаннай психологиялул кафедра. ХIасанхIусайн итвссар кафедралул каялувчину. Шикку АПН СССР-данул дурссар щалагу Союзрал элмийсса кIира конференция.

ХIасанхIусайн давривугу, элмулувугу, цала оьрмулувугу хъинну марцIсса, тIайласса, мачча-гъаннан акъа чара ба­къасса, ларайсса тарбиялул профессор уссия. Ванал сасан бувсса психологиялул кафедра дязаннуну хъанай буссия щала Ухссавнил Ккавкказнаву.
Ванал даврин лахъсса кьимат бишлай дуллуна профессорнал цIа, увчIуна РСФСР-нул психологтурал президиумрал вакилну, 1982-ку шинал АН СССР-данучIасса Психологтурал обществалул хIакьсса вакилну.1985-ку шиная 2009-ку шинайннин ДГУ-рал психологиялул кафедралий профессорну уссия.
ХIасанхIусайннул бувсса марцIсса захIматран лавайсса кьимат бишлай, ванан дуллуна «Почетная грамота Президиума Верховного Совета ДАССР», «Заслуженный учитель Дагестана», «Отличник просвещения СССР», «100-летие В. И. Ленина», «Ветеран труда СССР» медальлу.
Ванал яла яргми лахъазанну хъанай дия: дакI хъиншиву, аьркиннал чIарав ацIаву, пахру-хиял бакъашиву, хIалимшиву – мукун дакIний ливчIунни МахIмухъал ХIасанхIусайн ЧIяйннал жяматран, дустуран, мачча-гъаннан.

Ххаллилсса мархрайри ккаккиялунсса ахъулсса шайсса. ТачIав дакIния къабуккай ХIусанхIусайннул ттухьва ихтилат багьувкун учайсса: «Жунма зарал къабувну цаманан хъинбала бан къашайссар» тIисса махъру.
ХIасанхIусайннун хъинну кIулну бивкIун бур инсаннал оьрму шиннардиву бакъашиву – дугърисса, чумартсса давурттаву бушиву.
Увкуну бурхха М. Цицероннул : «ЛивтIуминнал оьрму гихунмайгу наниссар сагъминнал дакIурдиву».
Ш. Шалласуев