Дагъусттаннал вице-премьернал чIумуйсса кIанайма Альберт Хасауовлул дунни мармарчарил чIитIлищал (мраморный клоп) талатаврил хIакъиравусса батIаву.

Ванал бувсунни мармарчарил чIитI цукунсса зиянчи буссарив ва балжисса чаранну буван аьркинну бушиву чIитI щала республикалийх ппив къахьуншиврул.
Ттурусса мраморданул чIитI (коричнево-мраморный клоп) – му карантинданул зиянчири, мунил лиян байссар ахъулссаннул ва ахънилссаннул мурхьру, мукунма къюмайтIутIи. Гания инсаннан зарал бакъассар, цанчирча ганил кьацI къаучайссар ва азардугу лахъан къадайссар, амма ганил хъунмасса зарал биян байссар шяраваллил хозяйствалун. Ва журалул чIитIлищалсса талатаву хъанахъиссар цила чIумал ашкарагу бувну, мунил кюртти бухлаган баву.
Дагъусттаннай чIитIлин карантин бивхьуну бур МахIарамкантуллал, Дарбантуллал, Сулайман-Стальскаллал,Табасараннал ва Хивуллал районнай. Россельхознадзорданул ххал дурну дур МахIарамкантуллал райондалийсса хозяйствартту, цаппаранниву дирхьуну дур феромондалул ловушкарду, шяраваллал жяматирттащалгу бувну бур чIитIлил зарал биян байшиврул хIакъиравусса ихтилатру. Муниципалитетирттангу буллуну бур карантиндалул хIакъиравусса инструкцияртту. Карантиндалул зоналул лагру дур 318 азарда гектар.
МахIарамкантуллал райондалул ларсун дур 160 литра чIитIлищал талатаву дачин дайсса даруврал. Ахттиял райондалийгу ашкара бувну бур зиянчи, тиккугу дачин дурну дур талатаву.
ДР-лул МЧС-рал управлениялул хъунама Муслим Деаришбаговлул бусаврийну, аьркинну бур зиянчитуращал талатаву дачин дувансса пишакартурал хасъсса группа дузал буван ва лавайсса даражалул хIадуршиврул низам дачин дуван.
Альберт Хасауовлул тIимунийну, муниципалитетирттал администрациярттугу, аьрщараха зузимигу, вацIрал каялувчиталгу цачIу зун аьркинну бур. Талатавриву агьаммур кIану бугьан аьркинну бур химиялул дарув бищаврил лагру гьарта даврил, феромоннал ловушкарду дишайсса кIанттурду гьарза баврил ва мониторинг даврил.
БатIаврил хIасиллу дуллай, Хасауовлул тапшур бунни дузал дуван территориярттал оператив мониторинг, чIитIирдал кюртти бухлаган буван, чан буван шяраваллил хозяйствалун биян бан бюхъайсса зараллу.
ХI. Аьдилов