МахIачкъалалив лавайсса даражалий хьунни «Ххувшаврил варистурал Парад». Ва хас дурну дия Щалагу Аьрасатнал оьрчIал жяматийсса организациярттал кьинилун, Буттал кIанттул цIанийсса Хъунмасса дяъвилий Ххувшаву ларсун 81 шин шаврин ва Аьрасатнал Халкьуннал цашиврул шинан.

Парадрал лагма лаган бунни «Цалчинминнал Суккушиндарал» 5 азара инсан. Лениннул цIанийсса майданнив хьусса Парадрай гьуртту хьунни Дагъусттаннал 52 райондалиясса дуклаки оьрчIру ва активистал – аьмну 2,5 азара оьрчI. Кьюкьлуву бия хасъсса аьралий операциялий жанну дуллусса аьралийтурал оьрчIру, «Академия Добра» АНО-лул, «#Мывместе» штабрал активистал, «Аьрасатнал орлята», юнармейцы, волонтертал, ххассалбувулт, поисковиктал. Бусравсса хъамаллуравух бия Дагъусттаннал ХIукуматрал председательнал хъиривчунан кIанайсса Муслим Телякавов, МахIачкъала шагьрулул бакIчи Жамбулат Салавов, ванал хъиривчутал ва м.ц.
Муслим Телякавовлул кIицI лавгунни Парадрал гьурттучитал бюхттулсса Ххувшаврил варистал хъанахъишиву.
– Зуру дакIнийхтуну Ватандалуха аякьа дуллалими, буттахъал аьпа ябуллалими, гьунттийсса кьинилул хъар лархъми. Зул суккушиндарал кьюкьа гьантлия гьантлийн хъунна хъанай дур. Зу гьуртту хъанай буру Ватандалул вирттаврал аьпа ябаву мурадрайсса агьамсса давурттаву. Мунилгу жу хъуннасса вихшала дишин буллай буру жула билаятрал бучIантIимунийн, – увкунни ванал. «Цалчинминнал Суккушиндарал» председатель Людмила Саидовал кIицI лавгунни Парад Суккушиндарал активистал хьушиву хьунабакьинсса, цала лайкьшивурттая ва ккаккиярттая бусансса, жула республикалул ляличIишиву, яргшиву ккаккан дансса ишну. Гьур­ттучитал бувкIун бия парадрайн миллатирттал янналуву, мунийнугу чIяву миллатру бусса жула билаятрал ляличIисса колорит чIалай дия.
Хъинну асар хьунсса бия вирттаврал аьпалун кIяла хьхьиру итабавкьусса лахIза. Аьралий маршрахун колонна ларгунни шагьрулул агьаммур майданния Лениннул комсомолданул цIанийсса паркравун дияннин. Шикку аьралийчунал гьайкалдануцI тIутIивгу дирхьуну, минутрайсса пахъ багьаву дунни. Ва кьинисса агьам­сса ишну хьунни «Цалчинминнал Суккушиннаравун» активистал кьамул баву. ОьрчIал цинявннал хьхьичI хъа бувну махъ, каялувчитурал ва бусравсса хъамаллурал Жамбулат Салавовлул, жагьилтурал иширттал министр Камил Саэдовлул ва цайминал бавхIунни миннай галстукру. Хъирив ккаккан дунни оьрчIал коллективругу гьуртту хьусса концерт, бунни экскурсия Аьралий савлугърал музейравун.

Андриана Аьбдуллаева