Апрельданул 21-нний ЦIуссалакрал райондалул администрациялул къатраву хьунни Буттал кIанттул цIанийсса Хъунмасса дяъвилий ххув хьуну 80 шин шаврин хас дурсса мероприятиярттайнсса хIадуршиндарал ялувсса батIаву. Шикку гьуртту хьунни райондалул администрациялул ва идарарттал зузалт.
Райондалул бакIчинал цалчинма хъиривчу Султан ХIамзаевлул кIицI лавгунни, щала билаятрай кунма, райондалул агьалинал хьхьичIгу бушиву Ххувшаврил кьинилун хас дурсса давуртту бюхттулсса даражалий бартдигьинсса мурад. ХIадур дурну дур байрандалул программа. Нюжмардул мутталий райондалий най дикIантIий дур субботникру.
Райондалул шяраваллал бакIчитурайн, идарарттал каялувчитурайн тапшур бунни «Георгиевская ленточка» тIисса акциялувух хIала буххаву, бюхттулсса Ххувшаву ларсминнахь барчаллагь тIутIисса баннерду лахъаву.
Райцентрданий ЦIуссалакрал шяраву хьунтIий дур дяъвилий ливтIуми дакIнин бичлачисса мероприятияртту.
Райондалул Культуралул управлениялул зузалтрал ккаккан дантIиссар Ххувшаврил байрандалун хас дурсса концертрал программа.
