Апрельданул 10-нний МахIачкъалалив Фазу Аьлиевал цIанийсса скверданий хьунни Ххувшаврил 80 шинал юбилейран хас дурсса «Сирень Победы» тIисса акция.
Ванил мурадну хъанай бур ялун нанисса никиран Буттал кIанттул цIанийсса Хъун дяъвилул тарихрал агьамшиву ва Ватан дуручлай къучагъну талай бивкIминная кIулну бикIаву. Му бакъассагу, жагьилтал Ватан ххирану, тарихрал кьадру-кьимат буну тарбия баву.
Шикку гьуртту хьунни ДР-лул миллатрал ва диннал иширттал министр Энрик Муслимов, Дагъусттаннал Хъаннил союзрал председатель Интизар Мамутаева, МахIачкъала шагьрулул 49-мур школалул директор Аьбдулкарим Айгунов, ДГУНХ-лул туризмалул ва колледжрал директор Айна ХIабибова ва ДГУНХ-лул волонтертурал идарарттал вакилтал.
Ва кьини акциялул гьурттучитурал дургьунни тIутIив ва сиреньдалул къатIри.
– Жува пахрулий бикIан аьркинссару билаятрал авадансса тарихрая. Жагьилминнахьгу буслан аьркинссару билаятрал цашиву ва тархъаншиву дуручлай бивкIсса вирттаврая. ХIакьину хасъсса аьралий операциялий лайкьсса даражалий аьралий буржру бартбигьлай бур жула жагьилтал. ЦIанасса никирангу кIулну бикIан аьркинссар ва эбратну хьун аьркинссар жула вирттал, – увкунни министрнал.
Акциялул лагрулий Энрик Муслимов хьунаавкьунни Аьбдулкарим Айгуновлущал. Аьрасатнал билаятрал мурадру бартбигьлай талатиминнан гуманитар кумаг баврихлу ванан дуллунни Дагъусттаннал Миллатрал политикалул ва диннал иширттал министерствалул чулухасса хIурматрал лишан.
Шиккува кIицI лаган, Аьбдулкарим хасъсса аьралий операциялул гьурттучитуран чялишну кумагру буллалиминнавасса ца хъанай ур. Ва цимилагу дуки-хIачIия, медикаментру, маскировочный къертту, рацияртту, генераторду, аьралитуран аьркинсса цаймигу кьай-кьуй ва дуклаки оьрчIал чивчусса чагъарду биян бан лавгун ур СВО-лийн. Аьралийтуран кумаг баврихлу, Аьбдулкарим цимилагу лайкь хьуссар «Каспий» батальондалул командованиялул ва ДР-лул бакIчи Сергей Меликовлул чулухасса Барчаллагьрал чагъардан.
Имара Саидова
