Аьрасатнал тележурналист, мусапир Андрей Понкратов ларгсса нюжмардий «Моя Планета» телеканалданул съёмкарду дай группалущал Цалчинмур ЦIувкIрав уссия. Аьрасатнал ва кьатIаллил билаятирттал агьалинан ва кIулссар «Вокруг света», «Человек мира с Андреем Понкратовым», «Рекорды моей планеты», «А дома лучше» телепередачартту дачин дуллалиману.

Щалагу дунияллийх уклакисса, икъавсса кIану къабивтсса Понкратовлул ЦIувкIравсса аьрххилул мурадгу пагьламантурал шяраваллия, магьирлугърая «Свой среди других» тIисса проектраву бусансса бия. Ва цIусса проект душиву, премьерагу Дагъусттаннал агьалинал культуралия, вайннавухра ЦIувкIуллалмуниягу бусантIисса давур тIий, чIурчIав дуллай ур. Ванал цала тIийкун, тIабиаьтралгу кабавкьуну, ­дарусса, баргъ бивтсса кьини хьуну дур вай Лаккуй бивкIсса кьини. ЦIанихсса пагьламан Камил Мамаевлул хьхьуттай гьунарду ккаккан бувна. Хьхьуттайн гьаз хьуна цува хъамаличувгу. «Гъирарай гьуртту хьура на опыт бусса мусапир Андрей Понкратовлул программалуву.

Ванал оьрмулуву цалчин хьхьуттай шару лавсъссагу Цалчинмур ЦIувкIраври, мадара сивсусса ия цувагу. Ва проектгу лавгзаманнул ва уттисса чIумул дахIаву дуллалисса ламу хIисаврайсса ххуйсса давур. Ва проектрава дунияллул агьалинан авадансса культуралул ирс-ххазина кIул хъанахъиссар, цуминнал цукунсса культура, аьдатру, магьирлугъ дуссарив. Бусласиссар цала рувхIанийсса хъус-ххазина кьиматрай ябуллалиминная. БусантIиссар ЦIувкIуллалмур магьирлугъраягу», – увкунни Камиллул.
«Моя Планета» телеканалданул хъунама редактор Роман Любашовлул цIаниясса Барчаллагьрал чагъаргу буллунни Камиллун, пагьламантурал магьирлугъ цIу дуккан ва гьаз дуван буллалисса захIматрахлу.

Андрей Понкратовлулгу ялагу кIицI лавгунни, цува Дагъусттаннайн уттинингу цимилагу увкIшиву, гьарца аьрххи ххуйчулий дакIний личIансса шайшиву. Бувсуннни чара бакъа цIусса ци-дунугу лахьхьайшиву увкIтари, ва ххуллухьгу цIу-цIусса затругу лавхьхьушиву, пагьламантурал искусствалия бусласисса передачагу ва нанисса октябрь зуруйра ккаккан дувантIишиву.

Жугу та дикIантIиссарив мяйжан бувну, баян буванну зунгу. Уттива мадарасса инсантурал кIицI лавгунни социал сетирдай Андрей Понкратовлул передачартту гъирарай ххал дувайшиву, ЦIувкIуллаясса сюжетрахгу ялугьлантIишиву.

ПатIимат Рамазанова